აშშ რუსეთის მიერ კონტრსანქციების ფარგლებში დიპლომატიური პერსონალის 755 ადამიანით შემცირებას „გაუმართლებელ ზომად“ მიიჩნევს.
აღნიშნულის შესახებ სააგენტო „რია ნოვოსტის“ აშშ-ს სახელმწიფო დეპარტამენტის წარმომადგენელმა განუცხადა.
„ჩვენ ახლა ვფიქრობთ რუსეთის მიერ გადადგმულ ამ ნაბიჯს და თუ როგორ ვუპასუხებთ. ამ მომენტში სხვა კომენტარებს არ ვაკეთებთ“, - განაცხადა აშშ-ს სახელმწიფო დეპარტამენტის წარმომადგენელმა.
აღსანიშნავია, რომ Washington Post-სთვის მიცემულ ინტერვიუში აშშ-ს სახელმწიფო დეპარტამენტის ოფიციალურმა წარმომადგენელმა ჰიზერ ნაუერტმა განაცხადა, რომ აშშ ღრმად იმედგაცრუებულია და აპროტესტებს რუსეთის მიერ მიღებულ ზომას.
შეგახსენებთ, აშშ-ის წინააღმდეგ კონტრსანქციების ფარგლებში რუსეთი აშშ-ს დიპლომატიური წარმომადგენლობების პერსონალს 755 ადამიანით შეამცირებს. ამის შესახებ რუსეთის პრეზიდენტმა ვლადიმერ პუტინმა განაცხადა. მისი თქმით, აღნიშნული ეხება რუსეთში მომუშავე როგორც დიპლომატებს, ასევე ტექნიკურ პერსონალს.
