საქართველოს გენერალურმა პროკურატურამ უკრაინას ფაქტები მიაწოდა, რომელიც უკრაინის ხელისუფლებისთვის უცნობი იყო მიხეილ სააკაშვილისთვის მოქალაქეობის მინიჭებისას. აღნიშნულის შესახებ უკრაინის შინაგან საქმეთა მინისტრის მრჩეველმა ანტონ გერაშენკომ „ფეისბუქის“ პირად გვერდზე დაწერა.
„მიხეილ სააკაშვილს მართლაც ჩამოართვეს უკრაინის მოქალაქის სტატუსი. აღნიშნული განხორციელდა მოქალაქეობის შესახებ კანონის 21-ე მუხლის თანახმად“, - წერს ანტონ გერაშენკო.
მისი თქმით, საქართველოს პროკურატურამ უკრაინის მხარეს ფაქტები გადასცა, რომელიც მიხეილ სააკაშვილმა განზრახ დამალა უკრაინის მოქალაქეობის მიღებისას და რომელიც უკრაინისთვის ცნობილი არ იყო.
„მოქალაქის სტატუსის მინიჭების გადაწყვეტილების გაუქმება იმ შემთხვევაში ხდება, როდესაც პირმა, რომელსაც სურს უკრაინის მოქალაქეობის მიღება, მიაწოდა შესაბამის სტრუქტურებს ყალბი მონაცემები, მოიტყუა, ყალბი დოკუმენტები წარადგინა ან დამალა მნიშვნელოვანი ფაქტები თავისი ბიოგრაფიიდან“, - აღნიშნავს გერაშენკო.
