უკრაინის პრეზიდენტის პეტრო პოროშენკოს განცხადებით, უკრაინა ჯერ რეფორმების პროგრამას შეიმუშავებს და შემდეგ შეიტანს ალიანსში წევრობაზე განაცხადს. აღნიშნული განცხადება პოროშენკომ უკრაინა-ნატო-ს კომისიის სხდომაზე გააკეთა.
„ჩვენი პრიორიტეტია ევროატლანტიკურ სივრცეში ინტეგრაცია, რათა ნატო-ში წევრობა მივიღოთ, მაგრამ ეს არ ნიშნავს, რომ დაუყოვნებლივ შევიტანთ განაცხადს. ჩვენ რეფორმების პროგრამის, სტანდარტების დასაკმაყოფილებლად თანამშრომლობის პროგრამის შემუშავება გვჭირდება. ამიტომაც, გვჭირდება ნატო-ს პარტნიორების დახმარება და თანამშრომლობა და საამისოდ მზად ვართ“, - განუცხადა პეტრო პოროშენკომ ნატო-ს გენერალურ მდივანს იენს სტოლტენბერგს.
დღეს, კიევში უკრაინა-ნატო-ს კომისიის საზეიმო სხდომა იმართება, რომელიც კიევსა და ალიანსს შორის ოც წლისთავს ეძღვნება.
აღსანიშნავია, რომ 6 ივლისს, უკრაინის პრეზიდენტმა პეტრო პოროშენკომ ხელი მოაწერა კანონს უკრაინის ნატო-ში გაწევრიანების პრიორიტეტულობის შესახებ.