ეროვნული უშიშროების საბჭო პრეზიდენტს აძლევს რჩევას იმ საკითხებზე, რომლებიც არის მთავრობის გამგებლობის ქვეშ, რაც უმარტივესი იურიდიული ნონსენსია, - ამის შესახებ საქართველოს პარლამენტის თავმჯდომარე ირაკლი კობახიძემ დღეს გამართულ პრესკონფერენციაზე განაცხადა.

კობახიძის თქმით, პრეზიდენტის უფლებამოსილების კუთხით კონსტიტუციის შეთავაზებულ რედაქციაში გარკვეული დაზუსტებები არის შეტანილი, თუმცა არსებითი ცვლილება მხოლოდ ორ ნაწილში ხდება.

„ხშირად აქაც არასწორი ინფორმაცია მიეწოდება საზოგადოებას. მათ შორის, რამდენიმე ჟურნალისტმაც გააკეთა ასეთი განცხადება, რომ ის კომპეტენციებიც ქრება კონსტიტუციაში, რომელიც მანამდე ჰქონდა მიკუთვნებული პრეზიდენტს. რეალურად, არსებითი ცვლილება ჩვენ გვაქვს მარტო ორ ნაწილში: ერთი არის ეროვნული უშიშროების საბჭოს გაუქმება და ჩანაცვლება თავდაცვის საბჭოთი და მეორე - უზენაესი სასამართლოს მოსამართლეების წარდგენა. არც ერთ სხვა შემთხვევაში პრეზიდენტის კომპეტენციები არ გადაისინჯება“, - განაცადა კობახიძემ.

მისივე თქმით, ორივე ამ ცვლილებასთან დაკავშირებით არსებობს ვენეციის კომისიის შესაბამისი რეკომენდაცია.

„სხვა კომპეტენციები რჩება პრაქტიკულად უცვლელი სახით. მეტსაც გეტყვით, როგორც არ უნდა გადასინჯო კონსტიტუცია, შეუძლებელია პრეზიდენტის კომპეტენციების არსებითად ან გაზრდა ან შემცირება, იმიტომ რომ პრინციპული ცვლილება ამ კუთხით კონსტიტუციაში შევიდა 2010 წელს, როდესაც განისაზღვრა, რომ ერთადერთი ორგანო, რომელიც ახორციელებს ქვეყნის საშინაო და საგარეო პოლიტიკას, ეს არის საქართველოს მთავრობა“, - განაცხადა ირაკლი კობახიძემ.

მისი თქმით, პრეზიდენტის 100%-იანი ძალაუფლება დაახლოებით, 0,3%-მდე სწორედ 2010 წლის საკონსტიტუციო ცვლილებების დროს დავიდა.