თუ აქ საუბარი იქნება კრიმინალიზაციაზე, ამ შემთხვევაში პირადად ჩემი აზრია და გუნდიც ამას დაეთანხმება - არ მივიღებთ ამ მოცემულობას, - ამის შესახებ ფრაქცია ”ქართული ოცნების” თავმჯდომარე მამუკა მდინარაძემ იმ ინიციატივის შეფასებისას განაცხადა, რომლის თანახმადაც, მოსამართლის შეურაცხყოფისთვის სანქციები უნდა გამკაცრდეს. როგორც მდინარაძემ აღნიშნა, თუკი საფრთხის ქვეშ დადგება გამოხატვის თავისუფლება, საკანონდებლო ორგანო რაიმე სახის რეგულაციების დაწესების წინააღმდეგი იქნება.

„თუ აქ საუბარი იქნება კრიმინალიზაციაზე, ამ შემთხვევაში პირადად ჩემი აზრია და გუნდიც ამას დაეთანხმება - არ მივიღებთ ამ მოცემულობას, გამომდინარე იქიდან, რომ ამან შეიძლება საფრთხე შეუქმნას, რისკის ქვეშ დააყენოს სიტყვის და გამოხატვის თავისფულება. რაც შეეხება კანონპროექტს, რომელიც შესაძლებელია პარლამენტში შემოვიდეს და გარკვეულ ადმინისტრაციულ სახდელს აწესებდეს ან ამკაცრებდეს კონკრეტული შეურაცხყოფისთვის რეგულაციას, ამაზე მსჯელობა შეიძლება. უნდა ვნახოთ რა პროექტს შემოიტანენ მოსამართლეები საკანონმდებლო ორგანოში”, - განაცხადა მდინარაძემ.

იუსტიციის უმაღლესი საბჭო მოსამართლის შეურაცხყოფაზე საკანონმდებლო რეგულაციის დაწესების ინიციატივით გამოდის. აღნიშნული მოსაზრება იუსტიციის უმაღლესი საბჭოს წევრებმა 4 აპრილს, იურიდიულ საკითხთა კომიტეტის სხდომაზე გამოთქვეს და დეპუტატებს ამ საკითხზე დისკუსიის დაწყება შესთავაზეს.

ამასთან, იუსტიციის უმაღლესმა საბჭომ რამდენიმე დღის წინ განცხადება გაავრცელა და გააკრიტიკა მედიის წარმომადგენლების მიერ ბოლო პერიოდში გამოთქმული მოსაზრებები. საბჭოს შეფასებით, ეს განცხადებები წარმოადგენს სასამართლო სისტემის ინსტიტუტისადმი უპატივცემულობას და მოსამართლეთა ინდივიდუალური რეპუტაციის უფლების არაერთგზის უხეშ შელახვას. იუსტიციის უმაღლესი საბჭოს მოსამართლეებმა რეაგირებისთვის მიმართეს საქართველოს ჟურნალისტური ეთიკის ქარტიას, კომუნიკაციების ეროვნულ კომისიას, ჟურნალისტთა კორპუსს, სამოქალაქო სექტორს, სახალხო დამცველსა და ქართულ საზოგადოებას.