საქართველოში მცხოვრები თურქეთის მოქალაქეების უმრავლესობამ რეფერენდუმში საკონსტიტუციო ცვლილებებს მხარი არ დაუჭირა. 

თურქეთის რეფერენდუმში საქართველოდან 711-მა ადამიანმა მიიღო მონაწილეობა. აქედან 59.34%-მა საკონსტიტუციო ცვლილებებს წინააღმდეგ მისცა ხმა, 40.66%-მა კი მას მხარი დაუჭირა.

ამასთან, თბილისსა და ბათუმში შედეგები მცირედით განსხვავებულია. კერძოდ, ბათუმში: 49,12% - მომხრე, 50,88% - წინააღმდეგი; თბილისში - 34,86% მომხრე, 65,14% - წინააღმდეგი. 

საქართველოში ორი საარჩევნო უბანი იყო გახსნილი - თბილისში, თურქეთის საელჩოში და ბათუმში, თურქეთის გენერალურ საკონსულოში. 

გუშინ თურქეთში საკონსტიტუციო ცვლილებების შესახებ რეფერენდუმი გაიმართა. ამომრჩევლებმა თურქეთის კონსტიტუციაში 18 ცვლილების შეტანას მისცეს ხმა. ცვლილებები მმართველმა - „სამართლიანობისა და განვითარების პარტიამ“ მოამზადა. 

ცვლილებები მოიცავს: ქვეყნის საპარლამენტო სისტემიდან საპრეზიდენტოზე გადასვლას, პრემიერ-მინისტრის თანამდებობის გაუქმებას, საპარლამენტო მანდატების რაოდენობის 550-დან 600-მდე გაზრდას და თურქეთის უზენაესი სასამართლოსა და პროკურორების კოლეგიის რეფორმირებას.