თურქეთის პრეზიდენტმა რეჯეფ თაიფ ერდოღანმა ევროპის რიგი ქვეყნების პოზიცია გააკრიტიკა, სადაც ბოლო თვეების განმავლობაში ანკარაზე ღია თავდასხმებს ჰქონდათ ადგილი, - იუწყება სააგენტო „ანადოლუ“.
მისი თქმით, ნიდერლანდებისა და გერმანიის მთავრობების სკანდალური გადაწყვეტილებები შემთხვევითი არ იყო.
„გერმანიის ხელისუფლება ხელს უწყობს ტერორისტებს. როდესაც მე ვაცხადებ, რომ ევროპაში ტერორიზმი კვლავ ყვავის, დასავლეთში რიგი წრეების წარმომადგენლები გაოგნებულნი არიან. ჩემი სიტყვები ფაქტებს ეფუძნება. მაგალითად, ბერლინმა „ქურთისტანის მუშათა პარტიის“ ტერორისტების ექსტრადირების შესახებ ჩვენი 4 500-მდე მიმართვა უგულველყო“, - აღნიშნა თურქეთის პრეზიდენტმა.
რეჯეფ თაიფ ერდოღანის განცხადებით, დასავლეთის პოზიცია თურქეთთან მიმართებაში არაგულწრფელია.
„ნიდერლანდები, ავსტრია, გერმანია, შვეიცარია- ამ ქვეყნებში ტერორისტების მხარდამჭერი აქციები იმართება, რომელთა მონაწილეები თურქეთის პრეზიდენტის სურათით გამოდიან, რომლისკენაც იარაღის ლულაა მიმართული. ვინ ხართ ასეთი, თურქეთის პრეზიდენტს რომ ემუქრებით?“ - განაცხადა ერდოღანმა.
