რუსთის პრეზიდენტმა ვლადიმერ პუტინმა რუსეთის უშიშროების საბჭოს მუდმივ წევრებთან ერთად სირიაში არსებული სიტუაცია განიხილა. აღნიშნულის შესახებ რუსეთის პრეზიდენტის პრესმდივანმა დიმიტრი პესკოვმა განაცხადა.

„აშშ-ის მიერ განხორციელებული დარტყმების შედეგად სირიაში არსებული სიტუაციის დეტალური განხილვა შედგა“, - განაცხადა დიმიტრი პესკოვმა.

„ვაშინგტონის ქმედებები კიდევ ერთხელ კვალიფიცირებული იყო როგორც აგრესია, რომელიც საერთაშორისო სამართალს ეწინააღმდეგება“, - აღნიშნა რუსეთის პრეზიდენტის პრესმდივანმა.

მისივე თქმით, უშიშროების საბჭოს სხდომაზე „ღრმა აღშფოთება გამოთქვეს მსგავსი აგრესიული ქმედებების გარდაუვალი შედეგების გამო“.

„ასევე მწუხარება გამოთქვეს იმ ზიანის გამო, რომელიც რუსეთ-ამერიკის ორმხრივ ურთიერთობებს მიადგება“, - დასძინა დიმიტრი პესკოვმა.

პესკოვის თქმით, სხდომაზე ასევე სხვადასხვა საკითხი განიხილეს, რაც რუსეთის მიერ სირიაში ანტიტერორისტულ ოპერაციაში მონაწილეობის გაგრძელებას უკავშირდება.