ამ ვანდალური პროტესტისთვის ნებისმიერი სოლიდარობის გამოცხადება გაუმართლებელია

ამ ვანდალური პროტესტისთვის ნებისმიერი სოლიდარობის გამოცხადება გაუმართლებელია

პასუხისმგებლობის გრძნობის მქონე ოპოზიცია ბათუმში მომხდარ არეულობას არ უნდა იყენებდეს პოლიტიკური შესაძლებლობების საძიებლად - ამ ვანდალური პროტესტისთვის ნებისმიერი სოლიდარობის გამოცხადება გაუმართლებელია, - აღნიშნული განცხადებით “მოძრაობა თავისუფლებისთვის - ევროპული საქართველო” ბათუმში მომხდარ არეულობას ეხმაურება.

ამასთან, “ევროპულ საქართველოს“ მიაჩნია, რომ გუშინდელი ძალადობა არის სრულიად გაუმართლებელი და ვანდალური პროტესტი ბიძინა ივანიშვილის მთავრობის ხუთწლიანი მმართველობის შედეგია.

პარტიაში აცხადებენ, რომ შექმნილი ვითარების შეცვლა შესაძლებელია, მხოლოდ დემოკრატიული, მშვიდობიანი არჩევნების გზით დღევანდელი ხელისუფლების დამარცხებით.

პოლიტიკური გაერთიანების პოზიცია დღეს ჟურნალისტებს, სპეციალურ ბრიფინგზე, გიგი უგულავამ და გიგა ბოკერიამ გააცნეს. “მოძრაობა თავისუფლებისთვის - ევროპული საქართველო“ გმობს 11-12 მარტს ბათუმში მომხდარ ძალადობრივ აქტებს. ეს ვანდალური პროტესტი, რომელიც პოლიციის მანქანების დაწვასა და კერძო საკუთრების და საჯარო ქონების განადგურებაში გადაიზარდა, ხელს უშლის ქვეყანაში დემოკრატიული პროცესების განვითარებას და ჩრდილს აყენებს მშვიდობიანი პროტესტის ტრადიციას, როგორც ხელისუფლების წინააღმდეგ ბრძოლის ლეგიტიმურ ინსტრუმენტს.

გუშინდელი ძალადობა, ასევე, მასზე ხელისუფლების მხრიდან არაადეკვატური პასუხი, ზოგიერთ შემთხვევაში ძალის გაუზრებელი გამოყენება, ძირითადად კი, სრული უმოქმედობა, არის ივანიშვილის მთავრობის ხუთწლიანი მმართველობის შედეგი. მძიმე სოციალური ფონი, გაძვირებული ცხოვრება, ასევე ძალოვანი სტრუქტურების მხრიდან ივანიშვილის და არა ხალხის სამსახური, სუს-ის უპასუხისმგებლო და უკონტროლო ქმედებები, პატრულის შესუსტება, კრიმინალის ზრდა, ხელისუფლების მართული ძალადობრივი ჯგუფების გამოყენება და პოლიტიკური ძალადობის წახალისება არის იმ მთავარ მიზეზებს შორის, რომლებმაც გუშინდელი ქაოსი გამოიწვია.

“მოძრაობა თავისუფლებისთვის - ევროპულ საქართველოს“ მიაჩნია, რომ ამ გაურკვეველ და მძიმე ვითარებაში პასუხისმგებლობის გრძნობის მქონე ოპოზიცია არ უნდა ეძებდეს არეულობის შექმნის შესაძლებლობებს და არ უნდა იყენებდეს ამ პროცესებს პოლიტიკური ქულების ჩასაწერად. სწორედ ამიტომ “ევროპულ საქართველოს“ არც ერთ ეტაპზე სოლიდარობა არ გამოუცხადებია ძალადობრივი პროტესტისთვის.

ყველამ უნდა გაიგოს, რომ ძალადობრივი სცენარები არ არის სახელმწიფოს ეროვნულ ინტერესში და მხოლოდ აძლიერებს უპასუხისმგებლო ხელისუფლებას და ჩრდილს აყენებს მისი შეცვლის ერთადერთ უალტერნატივო გზას - დემოკრატიულ არჩევნებში მოქალაქეთა მაღალი აქტივობით ქართული ოცნების დამარცხებას”, - აცხადებენ პარტიის ლიდერები.