მჯერა, რომ ვნებათაღელვა ლტოლვილების შემოყვანაზე, ფუჭია, - ამის შესახებ „დემოგრაფიული აღორძინების ფონდის“ გამგეობის თავმჯდომარემ თამარ ჩიბურდანიძემ ავსტრიის საგარეო საქმეთა მინისტრის, სებასტიან კურცის იმ განცხადების კომენტირებისას აღნიშნა, რომლის თანახმადაც, ევროკავშირის ლტოლვილთა მიღების ცენტრები შეიძლება გაიხსნას საქართველოში, ეგვიპტესა და დასავლეთ ბალკანეთის ქვეყნებში.

თამარ ჩიბურდანიძის აზრით, საქართველოსთვის, სადაც მძიმე დემოგრაფიული მდგომარეობაა, ამის გაკეთება გენოფონდისთვის დამღუპველია.

„უკვე გააკეთა განცხადება დევნილთა და განსახლების მინისტრმა სოზარ სუბარმა, რომ ამ თემაზე ხელისუფლებას არავისთან უსაუბრია. სიმართლე გითხრათ, თავიდანვე ვფიქრობდი, რომ შეუძლებელია ამ წინადადებას ის ხელისუფლება დათანხმდეს, რომელიც თავად ახორციელებს დემოგრაფიულ პოლიტიკას, თუმცა სებასტიან კურცის განცხადებას ვნებათაღელვა აშკარად მოჰყვა საზოგადოებაში, განსაკუთრებით დემოგრაფებში, რომლებმაც ყველაზე კარგად იციან, თუ რა ნეგატიური შედეგები შეიძლება მოგვცეს საქართველოში დევნილების შემოყვანამ. აქ რამდენიმე მიზეზია, პირველი ის, რომ მოსახლეობის რაოდენობის კლება ქვეყანაში ქართული ეთნოსის ხარჯზე ხდება და ამაზე სართაშორისო კვლევები მიგვითითებენ. ამასთანავე, ქართველი ერი ადვილად შედის ასიმილაციაში სხვა ერთან, თუმცა აქ საუბარი არ გვაქვს მხოლოდ ქართულ ეთნოსზე, ჩვენ სრულიად საქართველოს გენოფონდზე ვზრუნავთ. გარდა ამისა, ქვეყანაში მძიმე სოციალური მდგომარეობაა და ჩვენ თვითონ გვყავს ნახევარ მილიონამდე შიდა დევნილი. 27 წელი გავიდა აფხაზეთის ომიდან და აფხაზეთის დევნილების დიდი ნაწილი ჯერ კიდევ არ არის საცხოვრებელი ფართებით დაკმაყოფილებული, რადგან სახელმწიფოს არ აქვს ამის საშუალება და ეტაპობრივად ხორციელდება. გარდა ამისა, გვყავს ეკომიგრანტებიც. როდესაც ასეთი მდგომარეობა გვაქვს, როგორ შეიძლება სხვა ქვეყნის დევნილების მიღებაზე ვისაუბროთ? საუბრობენ იმაზეც, რომ ამ პროცესში ქვეყანას დიდ ფულად დახმარებას აძლევენ. მერწმუნეთ, ვერანაირი თანხა ვერ გადაწონის იმ ნეგატიურ შედეგებს, რასაც ქვეყანა მიიღებს დევნილების შემოყვანით წლების შემდეგ. გამოვთქვამ ეჭვს, რომ ეს განცხადება გარკვეულწილად პროვოკაციული იყო. მჯერა, რომ ეს საკითხი დღის წესრიგში არ დადგება საქართველოს მხრიდან და ეს ვნებათაღელვაც, რაც ამ განცხადებამ გამოიწვია, ფუჭია“, - განაცხადა თამარ ჩიბურდანიძემ.