ქართველო ხალხო, სანამ თქვენი მოთმინება ამ ხელისუფლებას იტანს, იქნებით იმ დღეში, რა დღეშიც ხართ, - აღნიშნული განცხადება პარლამენტის პლენარულ სხდომაზე დეპუტატმა აკაკი ბობოხიძემ გააკეთა.
“ქართული ოცნება” მაგონებს ერთ-ერთ ქართულ ფილმში სანდრო ჟორჟოლიანის გმირს, რომელიც გოჭს კლავს და მერე მეპატრონეს ეუბნება: - შენ რა გაჯავრებს, პატრონი არაფერს ჩივაო. სწორია ”ქართული ოცნება”! პატრონი ანუ ქართველი ხალხი ხმას არ იღებს - უზრდიან გადასახადებს - ხმას არ იღებს, გატრუნულია! ჩაუძვრებიან ჯიბეში - ხმას არ იღებს, გატრუნულია! ამიტომ, ქართველო ხალხო, სანამ თქვენი მოთმინება ამ ხელისუფლებას იტანს, იქნებით იმ დღეში, რა დღეშიც ხართ! ჩემი დამოკიდებულება ჩემს ძვირფას ქართველ ხალხთან არის მარტივი - თუ უნდათ რომ არ იწუწუნონ, ხმა 20 ლარზე არ უნდა გაყიდონ, თუ უნდათ რომ გაჭირვებას არ შეეგუონ, ამ ხელისუფლებასაც ისე უნდა მოსთხოვოს პასუხი, როგორც სხვა წინა ხელისუფლებას მოსთხოვეს”, - განაცხადა ბობოხიძემ, თუმცა მას სხდომის წამყვანმა ირაკლი კობახიძემ გამოსვლის დასრულების საშუალება არ მისცა და მიკროფონი გამოურთო.
პარლამენტის პლენარულ სხდომაზე პირველი მოსმენით ”ფარულ მოსმენებთან” დაკავშირებული საკანონმდებლო პაკეტის განხილვა მიმდინარეობს.
