2012  ევროფესტივალის პირველი ნახევარფინალი ბაქოს „კრისტალ ჰოლში“ 22 მაისს გაიმართება. საზოგადოებრივი მაუწყებლის პირველი არხი სანახაობას პირდაპირი ეთერით 23:00  საათიდან გადასცემს.

დღეანდელ, პირველ ნახევარფინალზე ევროვიზიის სცენაზე სიმღერით 18 ქვეყნის წარმომადგენელი წარსდგება. ეს ქვეყნებია: მონტენგრო, ისლანდია, საბერძნეთი, ლატვია, ალბანეთი, რუმინეთი, შვეიცარია, ბელგია, ფინეთი,  ისრაელი, სან მარინო,  კვიპროსი, დანია, რუსეთი, უნგრეთი, ავსტრია, მოლდოვა, ირლანდია.

ანრი ჯოხაძე ბაქოს „კრისტალ ჰოლში“ 24 მაისს,- ევროფესტივალის მეორე ნახევარფინალურ საღამოზე იმღერებს.

ევროვიზიის სიმღერის კონკურსის წესის თანახმად, 26 მაისს  ფინალში ავტომატურად მონაწილეობენ: მასპინძელი ქვეყნის - აზერბაიჯანისა და „დიდი ხუთეულის“ გერმანიის, დიდი ბრიტანეთის, საფრანგეთის, ესპანეთის, იტალიის წარმომადგენლები. დანარჩენი ფინალისტების ვინაობა ნახევარფინალების შედეგად გაირკვევა.

რიგით 57-ე ევროვიზიის სიმღერის კონკურსს აზერბაიჯანი მასპინძლობს. კონკურსის ლოგოა - „ცეცხლოვანი ყვავილი“, სლოგანი - „დაანთე ცეცხლი“. კონკურსში წელს 42 ქვეყანა მონაწილეობს.