საკონსტიტუციო კომისიის პირველი სამუშაო შეხვედრა 21 იანვარს დაინიშნა. ცნობილია, საკონსტიტუციო კომისიის სამუშაო ჯგუფების სახელწოდებებიც.
21 იანვარს, 11:00-დან 18:00 საათამდე, საქართველოს პარლამენტის შენობაში, გაიმართება ადამიანის ძირითადი უფლებებისა და თავისუფლებების, სასამართლო ხელისუფლების, საქართველოს კონსტიტუციის პრეამბულისა და ზოგადი და გარდამავალი დებულებების საკითხთა სამუშაო ჯგუფის სხდომა.
საკონსტიტუციო კომისიის ადმინისტრაციულ-ტერიტორიული მოწყობისა და ადგილობრივი თვითმმართველობის საკითხთა სამუშაო ჯგუფის სხდომა დანიშნულია 23 იანვარს. კომისიის წევრები ამ დღეს 11:00-დან 17:00 საათამდე იმუშავებენ.
27 იანვარს, 13:00 საათიდან 19:00 საათამდე კი საქართველოს პარლამენტის, ფინანსებისა და კონტროლის და საქართველოს კონსტიტუციის გადასინჯვის საკითხთა სამუშაო ჯგუფის სხდომა გაიმართება.
ხოლო 28 იანვარს, 11:00 საათიდან 18:00 საათამდე საქართველოს პრეზიდენტის, საქართველოს მთავრობისა და თავდაცვის საკითხთა სამუშაო ჯგუფის სხდომა გაიმართება.
ოთხივე სხდომა თბილისში, საქართველოს პარლამენტის შენობაში გაიმართება.