პარლამენტის ყოფილის თავმჯდომარის, დავით უსუფაშვილის განცხადება, მართალი გითხრათ, განსაკუთრებულად სკანდალურად არ მომჩვენებია, - ამის შესახებ ექსპერტმა არჩილ გამზარდიამ ”პალიტრანიუსის“ გადაცემაში ”360 გრადუსი” სტუმრობისას განაცხადა. 

როგორც არჩილ გამზარდიამ განმარტა, დავით უსუფაშვილმა გააკეთა მესიჯები როგორც საზოგადოების, ისე პრეზიდენტისა და „ქართული ოცნების“ მისამართით. მისივე თქმით, პრეზიდენტის არჩევის წესთან დაკავშირებული საკითხი კავშირშია იმასთან, თუ რა რეიტინგი ექნება „ქართულ ოცნებას“ ზაფხულში. 

„ვფიქრობ, ეს იყო ერთი მესიჯი გარკვეულწილად ხელისუფლების მხარეს, ერთი მესიჯი პრეზიდენტის მხარეს და ერთიც საზოგადოების მხარეს. ვგულისხმობ იმას, რომ პირველ ივნისამდე არის განსაზღვრული დრო. ალბათ ეს ყველაფერი გაიზომება - რა პოზიციები, რა რეიტინგი ექნება „ქართულ ოცნებას“ ამ დროისთვის. თუკი „ქართული ოცნება“ გაახმოვანებს პრეზიდენტის არჩევის იმ მეთოდს, რაც პარლამენტის მიერ არჩევას გულისხმობს, შესაძლოა, ამ მესიჯით ზემოქმედების რაიმე ბერკეტს გულისხმობდეს, რომლის ფარგლებშიც შესაძლოა პრეზიდენტი გადადგეს.

იმ შემთხვევაში, თუ „ქართული ოცნების“ რეიტინგი იქნება იმდენად დაცემული, რომ 2016 წლის არჩევნებისგან განსხვავებით მოსახლეობა დაიწყებს არასახელისუფლებო კანდიდატის გარშემო თავისი სიმპათიების დალაგებას, ამ შემთხვევაში შესაძლოა, სიტუაციურად გაუსწროს ხელისუფლების ჩანაფიქრს და არჩევნებში გადაწყვეტილება ისევ ხალხმა გამოიტანოს, ხალხმა აირჩიოს პრეზიდენტი“, - აღნიშნა არჩილ გამზარდიამ. 

არჩილ გამზარდიამ დავით უსუფაშვილის სამომავლო პოლიტიკურ გეგმასთან დაკავშირებითაც გააკეთა შეფასება და განაცხადა, რომ პარლამენტის ყოფილი თავმჯდომარის პერსპექტივა მდგომარეობს მასში, როგორც დამოუკიდებელ სუბიექტში.

„თუ დავით უსუფაშვილი ზედმეტ კონტაქტზე გავა გინდაც მარგველაშვილთან, გინდაც „ქართულ ოცნებასთან“, ეს მასზე და მის პერსპექტივებზე დადებითად ვერ იმოქმედებს. ნებისმიერი სცენარის შემთხვევაში უსუფაშვილის შანსები ვერ გაიზრდება, თუკი ის დამოკიდებულია რომელიმე მათგანზე. მთელი პერსპექტივა არის იმაში, რომ ის იყოს დამოუკიდებელი სუბიექტი, ოღონდ იყოს საკმარისად ძლიერი, რომ მის გვერდით დაყენებული ლიდერების გარშემო დატრიალდეს ამომრჩევლის ნაწილი“, - აღნიშნა არჩილ გამზარდიამ.

„პალიტრანიუსის“ გადაცემის „360 გრადუსი“ განხილვის ერთ-ერთი თემა იყო პარლამენტის ყოფილი თავმჯდომარის, „რესპუბლიკური პარტიის“ ყოფილი ლიდერის, დავით უსუფაშვილის განცხადება, სადაც ის გიორგი მარგველაშვილის ვადაზე ადრე გადადგომას პროგნოზირებს.