დონალდ ტრამპი ამომრჩეველთა კოლეგიის მიერ პრეზიდენტად იქნა არჩეული

დონალდ ტრამპი ამომრჩეველთა კოლეგიის მიერ პრეზიდენტად იქნა არჩეული

დონალდ ტრამპმა ამომრჩეველთა კოლეგიის წარმომადგენლების 304 ხმა მიიღო და ამომრჩეველთა კოლეგიის მიერ პრეზიდენტად იქნა არჩეული, - იუწყება CNN. 

დემოკრატების საპრეზიდენტო კანდიდატმა ჰილარი კლინტონმა ამომრჩეველთა კოლეგიის წარმომადგენელთა 227 ხმა მიიღო. 

ამომრჩეველთა კოლეგიის შედეგები ოფიციალურად 6 იანვარს კონგრესის სხდომაზე დადასტურდება.

გუშინ თითოეულ შტატში და კოლუმბიის ოლქში ამომრჩეველთა კოლეგიის წევრები შეიკრიბნენ, რათა აშშ-ის პრეზიდენტი და ვიცე-პრეზიდენტი ოფიციალურად აერჩიათ.

აშშ-ის ფედერალური კანონის თანახმად, ამომრჩეველთა კოლეგიის წევრები 19 დეკემბერს იკრიბებიან და თითოეული წევრი ხელს აწერს ექვს ასლს, რომელიც პრეზიდენტისა და ვიცე-პრეზიდენტისთვის მათ მიერ მიცემულ ხმას ადასტურებს.

აღსანიშნავია, რომ 6 იანვარს აშშ-ის კონგრესმა ოფიციალურად უნდა დაითვალოს ამომრჩეველთა კოლეგიის ხმები. აღნიშნული სხდომის თავმჯდომარე აშშ-ის ვიცე- პრეზიდენტი ჯო ბაიდენი იქნება.