შეიძლება საერთოდ არ იყოს არანაირი ბარეიერი, არც ერთი პროცენტი, მაგრამ ამან შეიძლება საერთოდ პოლიტიკური პარტიების გაუქმება გამოიწვიოს - ამის შესახებ ”ინტერპრესნიუსს” ”რესპუბლიკური პარტიის” ერთ-ერთმა ლიდერმა ლევან ბერძენიშვილმა, ახალი პოლიტიკური ცენტრი ”გირჩის” ინიციატივის შეფასებისას განუცხადა, რომელიც საარჩევნო ბარიერის 1%-მდე დაწევას გულისხმობს.
ბერძენიშვილი გირჩის ინიციატივას საინტერესოს უწოდებს და ამ საკითხზე უმრავლესობის აზრი აინტერესებს.
”მე მგონია, რომ ეს საინტერესო აზრია და უნდა კითხოთ უმრავლესობას, რას ფიქრობენ ასეთ საკითხებზე. პირადად მე მგონია, რომ ეს საუბრები ახლა ძალიან შორსაა რეალობისგან, იმიტომ რომ მომავალი არჩევნები ასე ახლოს არაა. შეიძლება საერთოდ არ იყოს არანაირი ბარიერი, არც ერთი პროცენტი, მაგრამ ეს შეიძლება იწვევდეს მეტისმეტად ჭრელი პარლამენტის მიღებას ან საერთოდ პოლიტიკური პარტიების გაუქმებას. დღეს არსებული 5%-იანი ბარიერი მაღალია. ამიტომ იყო საუბარი 4-მდე ჩამოწევაზე, შეიძლება 3-მდეც ჩამოიწიოს, თუმცა 1% მე ვფიქრობ რომ ძალიან ცოტაა. პარტიები შეისწავლიან ალბათ ამ საკითხს და შესაბამის ფორმულას გამოიმუშავებენ”, - განაცხადა ლევან ბერძენიშვილმა.
”გირჩში“ მიიჩნევენ, რომ პოლიტიკური სტაბილურობისთვის მნიშვნელოვანია არსებითად შეიცვალოს საარჩევნო სისტემა, რაც ხელს შეუწყობს პოლიტიკური გაერთიანებების ადეკვატურ წარმომადგენლობას პარლამენტში, კერძოდ: გაუქმდეს მაჟორიტარული არჩევნები; შემოღებულ იქნას სრულად პროპორციული სისტემა ან ნაწილობრივ პროპორციული-ნაწილობრივ რეგიონულ-პროპორციული სისტემა; საარჩევნო ბარიერი დაწეული იქნას 1%-მდე.
