გიორგი ბოტკოველი, როდესაც ხელისუფლებაში იყო, გუბერნატორის მოადგილე იყო თუ პარტიას ხელმძღვანელობდა, რა მეთოდებითაც ატარებდა არჩევნებს, უნდა რომ ის პარალელი გაავლოს დღევანდელ ხელისუფლებასთან, - ასე გამოეხმაურა, „ქართული ოცნება - დემოკრატიული საქართველოს“ მაჟორიტარობის კანდიდატი ირაკლი სესიაშვილი მისი ოპონენტის, თელავსა და ყვარელში „ნაციონალური მოძრაობის“ მაჟორიტარობის კანდიდატის გიორგი ბოტკოველის მიერ დღეს გაკეთებულ განცხადებას.

როგორც „ინტერპრესნიუსს“ ირაკლი სესიაშვილმა განუცხადა, მისი ოპონენტი ამომრჩეველს ცრუ დაპირებებით გონებას უბნევს. სესიაშვილმა საუბრისას უარყო მისი და მისი შტაბის მხრიდან პედაგოგებზე რაიმე სახის ზეწოლის განხორციელება და აღნიშნა, რომ გიორგი ბოტკოველის სტრატეგია პროპაგანდასა და სიცრუეზეა აგებული.

„ბოტკოველის სტრატეგია აგებულია პროპაგანდასა და სიცრუეზე. ის ხმები, რომელიც ბოტკოველმა პირველ ტურში დააგროვა, სხვათა შორის, სწორედ ამ მეთოდით შეძლო. ეს არის მოსახლეობის მოტყუება. მისი ცრუ დაპირები, მოსყიდვა.

რაც შეეხება ამ განცხადებას, ბოტკოველი, როდესაც ხელისუფლებაში იყო, გუბერნატორის მოადგილე იყო, თუ პარტიას ხელმძღვანელობდა, რა მეთოდებითაც ატარებდა არჩევნებს, უნდა რომ ის პარალელი გაავლოს დღევანდელ ხელისუფლებასთან, „ქართულ ოცნებასთან“ და ამით საზოგადოებაში გააჩინოს გარკვეული ილუზიები, რომ „ქართული ოცნებაც“ ძალადობრივ საშუალებებს იყენებს“, - აღნიშნა სესიაშვილმა.

მისივე თქმით, თელავსა და ყვარელში იგი საბავშვო ბაღების, მუსიკალური სასაწავლებლების და სკოლის 300-ზე მეტ პედაგოგს შეხვდა და ეს შეხვედრები კანონის ფარგლებში გაიმართა. სესიაშვილის განცხადებით, მან პედაგოგებს მოუწოდა, რომ მხარი დაუჭირონ „ქართულ ოცნებას“, რადგან ეს არის ის ძალა, რომელსაც შეუძლია ქვეყანა დემოკრატიურლი გზით განავითაროს, რაც აშინებს „ნაციონალურ მოძრაობას“ და ყველა იმ პირს, რომელიც არ არის ჩვეული არჩევნების დემოკრატიულად ჩატარებას.

„არანაირი ძალადობა პედაგოგებზე არ ხორციელდება. არანაირი სურვილი არ მაქვს არც მე და არც „ქართულ ოცნებას“, რომ არჩევნებს შეურაცხყოფა მივაყენო და ამით ქვეყნის ინტერესები დავაზიანო“, - განაცხადა სესიაშვილმა.

„ნაციონალური მოძრაობის“ მაჟორიტარობის კანდიდატმა თელავსა და ყვარელში გიორგი ბოტკოველმა განაცხადა, რომ თელავსა და ყვარელში თანამდებობის პირები პედაგოგებს აიძულებენ ხმა მისცენ „ქართული ოცნების“ წარმომადგენელს.