ჩვენ ყოველთვის მხარს ვუჭერთ უკრაინის ყველა რეზოლუციას და შემდეგ უკრაინის დელეგაციის ხელმძღვანელი ადგება სესიაზე და ”ქართული ოცნება” ქართული კოშმარიაო, თქვენ პოლიტპატიმრები გყავთ - მერაბიშვილი და ახალაიაო და ჩაწერეთ დადგენილებაშიო, ამას რომ იტყვის, რაღაც რეაქცია გვექნება, - ამის შესახებ ”ქართული ოცნების” წევრმა ეკა ბესელიამ PalitraNews-ის გადაცემაში ”360 გრადუსი” განაცხადა, სადაც უპასუხა კითხვას, რომელიც ეხებოდა იმას, რომ საქართველოს დელეგაციამ ევროპის საბჭოს საპარლამენტო ასამბლეის სესიაზე (PACE) უკრაინის მხარდამჭერი რეზოლუციების კენჭისყრაში მონაწილეობა არ მიიღო.
მისივე თქმით, ამ საკითხზე ქართულ დელეგაციას რეაქცია რომ არ ჰქონდეს, გასაკვირი არ უნდა იყოს. ”ურთიერთობა არის ორმხრივი და ქვეყანას აქვს თავისი ღირსება”, - განაცხადა ბესელიამ.
რაც შეეხება კენჭისყრაში არ მონაწილეობას, ბესელიას განმარტებით, კომიტეტზე ქართულმა დელეგაციამ მხარი დაუჭირა რეზოლუციას, მაგრამ სესიის პარალელურად, საქართველოს დელეგაციას ჰქონდა მნიშვნელოვანი შეხვედრა შვეიცარიულ მხარესთან.
”კომიტეტის სხდომაზე, რომელსაც მე ვესწრებოდი, პირადად დავუჭირე მხარი მათ ყველა შესწორებას. სესიაზე მე კენჭისყრაში არ ვმონაწილეობდი, რადგან არ ვარ დელეგაციის ძირითადი წევრი და არ მაქვს კენჭისყრაში მონაწილეობის უფლება. ქალბატონი მანანა კობახიძე და ზვიად კვაჭანტირაძე, რომლებიც დელეგაციის ძირითად შემადგენლობაში იყვნენ, იმ პერიოდში ჩვენ ვმართავდით შეხვედრას შვეიცარია-საქართველოს მეგობრობის ჯგუფის ხელმძღვანელ ფილიპო ლომბარდისთან. მე ვარ პარლამენტში ამ ჯგუფის ხელმძღვანელი და ჩემთვის საქართველოს ინტერესები უფრო მნიშვნელოვანია, ვიდრე უკრაინის ინტერესები, თუ თქვენთვის პირიქით არის, კი ბატონო.
უკრაინის დელეგაციის ხელმძღვანელი, რომელიც ღიად ილაშქრებს საქართველოს წინააღმდეგ და ამბობს, რომ ”ქართული ოცნება” ქართულ ჯოჯოხეთად არის გადაქცეული, ვანო მერაბიშვილს და ბაჩანა ახალაიას პოლიტპატიმრებად აცხადებს, უკაცრავად, მაგრამ მათ ვასალებად თავს ვერ ვიგრძნობ. თუ ჩავთვლით საჭიროდ, დავუჭერთ მხარს და დავუჭირე კიდეც მხარი. ეს ის დელეგაციაა, რომელიც ღიად გამოხატავს სააკაშვილის და მისი მეგობრების სიმპათიას. ნუ გაგვხდით ახლა ჩვენ ამ დელეგაციის ყურმოჭრილ მონებად. თუ არ დავდევთ მათ კუდში, უკაცრავად.
რამე დავაკელით მათ? გითხარით, რომ ხმა მივეცი კომიტეტზე. ჩვენი დელეგაციის ორმა წევრმა მანანა კობახიძემ და ზვიად კვაჭანტირაძემ ჩათვალეს,რომ საქართველოს თემაზე შეხვედრა იყო უფრო მნიშვნელოვანი, თან არც უთხოვიათ მათთვის მხარდაჭრა უკრაინელ დეპუტატებს. ალბათ იმიტომ არ ითხოვეს, რომ პირდაპირ საუბრობენ სააკაშვილის ტექსტით და იუხერხულეს ალბათ და აღარ უთხრეს სესიაზე შესულიყვნენ, თორემ შეიძლება შესულიყვნენ ჩვენი კოლეგები. მათ ჩათვალეს, რომ უფრო მნიშვნელოვანია საქართველოს თემაზე შეხვედრა და ამისთვის ვკიცხავთ ამ ადამიანებს?!”, - განაცხადა ეკა ბესელიამ.
მისივე თქმით, ყველა უნდა გამოვიდეს გიორგი კანდელაკისეული მარწუხებიდან. ”კანდელაკის მრევლს გაუჩნდა ალბათ რაიმე შეკითხვა, მაგრამ ვისაც ავუხსენით და რეალობა იციან, მათ არ გაუჩნდებათ ეს კითხვები”, - განაცხადა ეკა ბესელიამ.
