როდესაც საუბრობენ, რომ საკონსტიტუციო უმრავლესობა სჭირდებათ იმისთვის, რათა დანაპირები შეასრულონ, კითხვის ნიშნები ჩნდება მათ გულწრფელობასთან დაკავშირებით - ამის შესახებ ”თავისუფალი დემოკრატების” ერთ-ერთმა ლიდერმა ლევან სამუშიამ ”ინტერპრესნიუსთან” საუბრისას განაცხადა, რითაც პრემიერის ინიციატივას გამოეხმაურა იმის შესახებ, რომ საქართველოს კონსტიტუციაში ცვლილებების შეტანის მიზნით სპეციალური სამუშაო ჯგუფი შეიქმნას.
”ზოგადად ჯგუფის შექმნის შემთხვევაში მზად ვართ მონაწილეობა მივიღოთ და ის ინიციატივები, რაც ჩვენ გვექნება და ქვეყნისთვის სასიკეთო იქნება, შევთავაზოთ ხელისუფლებას, თუმცა რამდენად გაითვალისწინებს ამას ”ქართული ოცნების” ხელისუფლება და რამდენად იქნება ეს ყოველივე რეალური და არ იქნება ფასადური, ამაზე კითხვის ნიშნები არსებობს.
როდესაც საუბრობენ, რომ საკონსტიტუციო უმრავლესობა სჭირდებათ იმისთვის, რომ დანაპირები შეასრულონ, კითხვის ნიშნები ჩნდება მათ გულწრფელობასთან დაკავშირებით, რადგან სასამართლო ან პროკურატურის რეფორმას არ სჭირდებოდა საკონსტიტუციო უმრავლესობა. საკონსტიტუციო უმრავლესობა არ უნდოდა ასევე საარჩევნო სისტემის რეფორმირებას. ამ ყველაფერს სჭირდებოდა უბრალო უმრავლესობა, რომელიც ჰქონდა 4 წლის განმავლობაში ”ქართულ ოცნებას,” თუმცა მან ეს არ გააკეთა”, - განაცხადა ლევან სამუშიამ.
რაც შეეხება პრეზიდენტის თანამონაწილეობას კონსტიტუციაში ცვლილებების შეტანის მიზნით სამუშაო ჯგუფის შექმნაში, ლევან სამუშაიას შეფასებით, პრეზიდენტის ინიციატივა და სურვილი ჩაერთოს ამ პროცესში მხოლოდ და მხოლოდ მისასალმებელია.
შეგახსენებთ, რომ პრემიერ-მინისტრი საქართველოს კონსტიტუციაში ცვლილებების შეტანის მიზნით ჯგუფის შექმნის ინიციატივით გამოვიდა. გიორგი კვირიკაშვილის თქმით, აუცილებლად შესაქმნელია ჯგუფი, რომელიც საზოგადოების თითოეული წევრის ფართო ჩართულობით კონსტიტუციაში ცვლილებებს განახორციელებს.
