ხალხმა უნდა გადაწყვიტოს - ანდობენ ასეთ „ქართულ ოცნებას“ საკონსტიტუციო უმრავლესობას, თუ მხარს დაუჭერენ ოპოზიციურ ძალებს, - ამის შესახებ „თავისუფალი დემოკრატების“ ჯერ კიდევ მოქმედმა თავმჯდომარემ ირაკლი ალასანიამ „რუსთავი 2“-ის ეთერში განაცხადა.
როგორც ირაკლი ალასანიამ აღნიშნა, ნებისმიერი პოლიტიკური ძალის ხელში საკონსტიტუციო უმრავლესობა არის სახიფათო.
„ნებისმიერი პოლიტიკური ძალის ხელში, პროგრესული რომც იყოს, ასეთი საკონსტიტუციო უმრავლესობა არის სახიფათო. მე აბსოლუტურად სხვანაირად წარმომედგინა. სხვანაირი პარლამენტი მინდოდა ყოფილყო - მრავალპარტიული, მაგრამ სამწუხაროდ, მოხდა ის, როგორც მოხდა. მე არანაირ პოლიტიკურ რჩევას არავის მივცემ. ერთადერთი მინდა საზოგადოებას მხარდაჭერა ვთხოვო ჭიათურაში ჩვენი მაჟორიტარობის კანდიდატის მიმართ, რადგან ის ბრძოლას აგრძელებს მეორე ტურში. დარწმუნებული ვარ, რომ თუ თეიმურაზ გაფრინდაშვილი პარლამენტში მოხვდა, ის ჭიათურისთვის ბევრი რამის გაკეთებას შეძლებს. რაც შეეხება საკონსტიტუციო უმრავლესობას, ესეც ხალხის გადასაწყვეტია, მათ უნდა გადაწყვიტონ - ანდობენ ასეთ „ქართულ ოცნებას“ საკონსტიტუციო უმრავლესობას, თუ მხარს დაუჭერენ ოპოზიციურ ძალებს, რომ დააბალანსოს და გაანეიტრალოს პარლამენტის შიგნით ძალთა განაწილება. ვთვლი, რომ რეალური ცვლილების მიღწევა ოთხი წლის შემდეგ იქნება შესაძლებელი“, - განაცხადა ირაკლი ალასანიამ.
სამოქალაქო საზოგადოების ნაწილი მიმართვას ავრცელებს, რომლითაც პროდასავლურ პოლიტიკურ პარტიებს არჩევნების მეორე ტურში ოპოზიციის კანდიდატების მხარდაჭერისკენ მოუწოდებს. გავრცელებულ მიმართვაში აღნიშნულია, რომ არსებობს საშიშროება ქვეყანაში ერთპარტიული მმართველობა დამკვიდრდეს, ამის თავიდან ასაცილებლად კი მათ მხარი უნდა დაუჭირონ ოპოზიციას. მიმართვის ავტორების მოსაზრებით, იმ შემთხვევაში, თუ ,,ქართული ოცნება” საკონსტიტუციო უმრავლესობას მოიპოვებს, არსებობს საშიშროება, ქვეყანამ დემოკრატიული პრინციპებიდან გადაუხვიოს.
