ალეკო ელისაშვილი - დავით ნარმანიას ბოლო რჩევას ვაძლევ ცხოვრებაში - თავისი ნებით დატოვოს თანამდებობა

ალეკო ელისაშვილი - დავით ნარმანიას ბოლო რჩევას ვაძლევ ცხოვრებაში - თავისი ნებით დატოვოს თანამდებობა

დავით ნარმანიას ბოლო რჩევას ვაძლევ ცხოვრებაში, რომ თავისი ნებით დატოვოს თანამდებობა, - ამის შესახებ ჟურნალისტებს თბილისის საკრებულოს დამოუკიდებელმა დეპუტატმა ალეკო ელისაშვილმა განუცხადა. 

ალეკო ელისაშვილის თქმით, იგი საკრებულოს ”ნაციონალური მოძრაობის” დეპუტატების მიერ ინიცირებულ პროცედურაზე, რომელიც თბილისის მერის გადაყენებაზე ხემოწერების შეგროვებას გულისხმობს, ხელს მოაწერს. 

ალეკო ელისაშვილის თქმით, დავით ნარმანიამ მერიაში გუშინ მომხდარი ფაქტის გამო ბოდიში უნდა მოუხადოს საზოგადოებას, ასევე სამარცხვინო მმართველობის გამო. 

”გუშინ იყო ბოლო წვეთი და მეც მივიღე გადაწყვეტილება, რომ უბრალოდ უხერხულია ნარმანია თბილისის მერის თანამდებობაზე დარჩენს. ადამიანი, რომელიც 2 წელი თავს ვერაფერს აბამდა, ვერაფერს აკეთებდა, ამას კიდევ ვითმენდით. ქალაქი ინერციით მიდიოდა. გუშინ საკუთარ კაბინეტში გაყოყოჩებული მაამებლებით გარშემორტყმული უცებ ძველბიჭად და უზრდელად მოგვევლინა და ახალგაზრდა გულანთებულ სტუდენტს აყენებდა შეურაცხყოფას. ამდენად, ყველაფერთან ერთად არის უზრდელი. ნარმანიას ბოლო რჩევას ვაძლევ ცხოვრებაში, რომ თავისი ნებით დატოვოს თანამდებობა”, - განაცხადა ელისაშვილმა. 

მისივე თქმით, ნარმანიამ ყველას უნდა მოუხადოს გუშინდელი უზრდელობის გამო ბოდიში, იმის გამოც, რომ ორი წლის განმავლობაში 2 მილიარდი დაიხარჯა და თბილისში ისევ არის ქუჩებში ორმოები. 

”თბილისის ისტორიაში ყველაზე არაეფექტური და სამარცხვინო მმართველობისათვის ნარმანიამ უნდა მოიხადოს ბოდიში და წავიდეს. ალბათ ჯობია, რომ ერთი საპასუხისმგებლო გადაწყვეტილება მაინც მიიღოს ცხოვრებაში”, - განაცხადა ალეკო ელისაშვილმა. 

დღეს ”ნაციონალური მოძრაობის” დეპუტატებმა საკრებულოში თბილისის მერისადმის უნდობლობის გამოცხადების პროცედურა დაიწყეს, რომლისთვისაც 24 დეპუტატის ხელმოწერაა საჭირო. აღნიშნულის შემდეგ საკითხი განსახილველად საკრებულოს სხდომაზე გავა.