19 აგვისტო არის ბოლო დღე, როცა ცენტრალურმა საარჩევნო კომისიამ საკრებულოების შუალედური არჩევნები უნდა დანიშნოს, თუკი ამ არჩევნების გამართვა 8 ოქტომბერს - საპარლამენტო არჩევნებთან ერთად არის გადაწყვეტილი. ანალოგიურად, თუკი ხელისუფლება გამგებლებისა და მერების რიგგარეშე არჩევნების დამთხვევას 8 ოქტომბრის საპარლამენტო არჩევნებისთვის აპირებს, ეს არჩევნებიც პრეზიდენტმა ხვალ უნდა გამოაცხადოს.

როგორც ცნობილია, ”ქართულმა ოცნებამ” პარლამენტის მთელ რიგ მაჟორიტარულ ოლქებში მოქმედი მერები, გამგებლები და საკრებულოს წევრები წარადგინა. ეს შესაბამის ადგილობრივი თვითმმართველ ორგანოებში რიგგარეშე არჩევნების ჩატარებას იწვევს. 

”საარჩევნო კოდექსის” მიხედვით, თუკი მაჟორიტარული საარჩევნო სისტემით არჩეულ საკრებულოს წევრს უფლებამოსილება ვადამდე უწყდება, შუალედური არჩევნები უახლოეს მაისში ან ოქტომბერში ტარდება, იმ პირობით, რომ შესაბამისი თვის ბოლომდე 60 დღე მაინც უნდა იყოს დარჩენილი. ამ შემთხვევაში საუბარია ოქტომბერზე, ოქტომბრის ბოლომდე კი, 60-დღეზე მეტია დარჩენილი. იმავდროულად, ”საარჩევნო კოდექსის” გათვალისწინებით, არჩევნების დღემდე არა უგვიანეს 50-ე დღისა ცესკო განკარგულებით შუალედური არჩევნების თარიღს ნიშნავს. 8 ოქტომბრამდე არა უგვიანეს 50-ე დღე არის 19 აგვისტო. 

რაც შეეხება გამგებლებისა და მერების რიგგარეშე არჩევნების საკითხს, კანონის მიხედვით, მერის ან გამგებლის უფლებამოსილების ვადამდე შეწყვეტის შემთხვევაში, რიგგარეშე არჩევნებს ნიშნავს პრეზიდენტი, პრემიერ-მინისტრის კონტრასიგნაციით. ეს ხდება მათი უფლებამოსილების ვადამდე შეწყვეტიდან არა უადრეს მე-8 და არა უგვიანეს მე-10 დღისა. არჩევნები ტარდება არჩევნების დანიშვნიდან არა უგვიანეს 50-ე დღისა და ეს დღე 8 ოქტომბრამდე არის 19 აგვისტო. 
”ქართული ოცნების” წარმომადგენელმა, პარლამენტის წევრმა გიორგი კახიანმა ”ინტერპრესნიუსს” დაუდასტურა, რომ კანონმდებლობის მიხედვით, ხვალ ბოლო დღეა, როცა ცესკომ - საკრებულოების შუალედური არჩევნები, ხოლო პრეზიდენტმა მერებისა და გამგებლების რიგგარეშე არჩევნები უნდა გამოაცხადოს. 
ამასთან, გიორგი კახიანის ცნობით, საპარლამენტო არჩევნებში მონაწილეობის მიზნით ”ქართული ოცნების” მხრიდან წარდგენილია ზუგდიდის საკრებულოს თავმჯდომარე და თბილისის საკრებულოს სამი წევრი. 

რაც შეეხება მერებსა და გამგებლებს, ”ქართულმა ოცნებმა” საპარლამენტო არჩევნებში (მაჟორიტარულ ოლქებში) ბოლნისის, ზუგდიდის, წალენჯიხის, ჭიათურის, ხარაგაულის გამგებლები და ახალციხის მერი წარადგინა.