ცესკომ იმ პრეცედენტით უნდა იხელმძღვანელოს, რომელიც მან პარტია ”ცენტრისტებთან” დაკავშირებით შექმნა, - ამის შესახებ ”ინტერპრესნიუსს” ”რესპუბლიკელმა” დეპუტატმა თამარ კორძაიამ განუცხადა.
კორძაიას თქმით, იურიდიული პირის, ამ შემთხვევეში პოლიტიკური პარტიის რეგისტრაცია უფლებამოსილების მქონე სუბიექტის რეგისტრაციასაც საჭიროებს.
როგორც მან ”ინტერპრესნიუსთან” საუბრისას განმარტა, თუკი ასეთი სუბიექტი განსაზღვრული არ იყო, საჯარო რეესტრს პარტია თავის დროზე რეგისტრაციაში არ უნდა გაეტარებინა. ამასთან, კორძაიას თქმით, ეს იმას არ ნიშნავს, რომ ცესკო არ არის პასუხისმგებლი, რადგან თავადაც ახდენს გარკვეული ტიპის რეესტრს და რეგისტრაციას და თავადაც არის პასუხისმგებელი, პარტიის უფლებამოსილი პირები იყოს განსაზღვრული.
”აქ ყველაზე მნიშვნელოვანი ის არის, რომ გამოვლინდა ხარვეზი. ახლა ადმინისტრაციულმა ორგანოებმა და ხელისუფლებამ უნდა შესძლოს ღირსეულად აღმოფხვრას ხარვეზი და ერთმანეთს კი არ აბრალონ, არამედ მიიღონ გადაწყვეტილება. თუკი ”ცენტრისტების” შეთხვევაში ეს გახდა პარტიის საარჩევნო რეგისტრაციის გაუქმების საფუძველი, რა თქმა უნდა, რეგისტრაცია დანარჩენ ცხრავე პარტიის შემთხვევაში უნდა გაუქმდეს. არსებობს უზენაესი პრინციპი - ეს არის თანასწორობის პრინციპი და თუკი დარღვევის გამო ერთმა აგო პასუხი, პასუხი სხვამაც უნდა აგოს. მოქალაქეს, ამომრჩეველს ნამდვილად არ აინტერესებს, ეს ვისი პრობლემაა და ვის გამო მოხდა, ეს შეიძლება საარჩევნო სუბიექტს ადარდებდეს და მან ასაჩივროს მიღებული გადაწყვეტილებები, მაგრამ მთავარი ის არის, რომ ახლა ცენტრალურმა საარჩევნო კომისიამ როგორც შექმნა პრეცედენტი, იმ პრეცედენტის მიხედვით უნდა იმსჯელოს და მიიღოს გადაწყვეტილებები. მთავარია, ყველას მიმართ იყოს ერთგვაროვანი მიდგომა”, - განუცხადა ”ინტერპრესნიუსს” თამარ კორძაიამ.
ცენტრალური საარჩევნო კომისიის ინფორმაციით, საჯარო რეესტრის ოფიციალურ ვებ-გვერდზე რეგისტრირებულია 9-პარტია, რომელსაც ხელმძღვანელობაზე უფლებამოსილი პირი არ ჰყავს. მისივე ცნობით, ცხრავე პარტია ცესკო-ში საარჩევნო რეგისტრაციაშია გატარებული.
