პარლამენტში არაერთი რეზოლუციაა მიღებული საქართველოს საგარეო კურსთან დაკავშირებით და ამის ფონზე რა არის ახალი ”რესპუბლიკელების” ინიციატივაში? - ასე გამოეხმაურა ”ინტერპრესნიუსთან” საუბარში უმრავლესობის წევრი ეკა ბესელია პარლამენტის თავმჯდომარის, დავით უსუფაშვილის საკონსტიტუციო ინიციატივას.
როგორც ბესელიამ აღნიშნა, საქართველოს კონსტიტუცით განსაზღვრულია, რომ ქვეყნის საკანონმდებლო ორგანო პარლამენტი განსაზღვრავს ქვეყნის საშინაო და საგარეო პოლიტიკას, პარლამენტი კი პირდაპირი დემოკრატიის გზით წარმოადგენს ხალხის ნებას.
”ეს ნება გამოხატული იქნა ჩვენი მოსახლეობის მიერ და ამიტომაც საქართველოს ხელისუფლებამ ხელი მოაწერა ევროკავშირთან ასოცირების ხელშეკრულებას.
პარლამენტში არაერთი რეზოლუციაა მიღებული საქართველოს საგარეო კურსთთან დაკავშირებით და ამის ფონზე რა არის ახალი ”რესპუბლიკელების” ინიციტივაში? სად არის კითხვის ნიშნები? არ მესმის მუდმივად რატომ ხდება ღია კარის მტვრევა?
კონსტიტუციის ცვლილებას განახორციელებს მომავალი, ახალი პარლამენტი და ეს იცის დავით უსუფაშვილმა. ახალ პარლამენტს კი არჩევნები განსაზღვრავს და შემოდგომაზე გამოჩნდება რა შემადგენლობით ვაგრძელებთ ქვეყნის მართვას. მე ვფიქრობ, რომ საარჩევნო კამპანიის დროს მსგავსი შემოთავაზებებით პარტიები ეძებენ თავის ნიშას”, - განაცხადა ეკა ბესელიამ.
მისივე თქმით, ყველაზე კარგი არის ის, რომ ამ არჩევნებზე ცალ-ცალკე გადიან. ”ამომრჩეველი გვეტყვის ვის რამდენი ნდობის მანდატი ექნება და ვინ უნდა ისაუბროს ხალხის სახელით”, - განაცხადა ბესელიამ.
პარლამენტის თავმჯდომარე დავით უსუფაშვილი ინიციატივით გამოდის, რომ კონსტიტუციის პრეამბულას, სადაც საუბარია, რა სურს ქართველ ხალხს, დაემატოს ფრაზა: ”დავიმკვიდროთ სრულფასოვანი ადგილი დემოკრატიული სახელმწიფოების უსაფრთხოების და თანამშრომლობის ევროატლანტიკურ სისტემაში”.
