მაიკლ კარპენტერი:   რუსეთმა საერთაშორისო წესრიგის ყველა პრინციპი დაარღვია

მაიკლ კარპენტერი: რუსეთმა საერთაშორისო წესრიგის ყველა პრინციპი დაარღვია

”ამერიკის ხმის” ქართული ბიურო აგვისტოს ომიდან 8 წლის შემდეგ რუსეთ-საქართველოს ომის შესახებ შეერთებული შტატების თავდაცვის მდივნის მეორე მოადგილესთან, მაიკლ კარპენტერთან ინტერვიუს აქვეყნებს.

ინტერვიუში ყურადღება გამახვილებულია, თუ როგორ შეცვალა ხუთდღიანმა ომმა საქართველო და რა გავლენა იქონია მან რეგიონის პოლიტიკაზე. სტატიაში ნათქვამია, რომ შეერთებული შტატების თავდაცვის მდივნის მეორე მოადგილე - მაიკლ კარპენტერი საბჭოთა კავშირის დაშლის შემდეგ წამოწეულ კონფლიქტებს შორის ერთმანეთს ყველაზე მეტად 2008 წლის საქართველო-რუსეთის ომს და უკრაინის კონფლიქტს ამსგავსებს.

„რუსეთმა საერთაშორისო წესრიგის ყველა პრინციპი დაარღვია, მან დაარღვია საერთაშორისო სამართალი, მეზობელი ქვეყნის სუვერენიტეტი, მისი საზღვრები, გაეროს ქარტიის ფუნდამენტური პრინციპები, 1991 წელს ხელმოწერილი ახალი ევროპის ქარტია, ჰელსინკის აქტი", - ამბობს კარპენტერი.

კარპენტერის თქმით, რუსეთმა უკრაინის მსგავსი ტენდენციები 2008 წელს გამოავლინა, როცა მან საერთაშორისო სამართალი დაარღვია და დამოუკიდებელი საქართველოს ტერიტორიაზე შეიჭრა. "რუსეთისთვის ეს ერთგვარი ქცევის წესია. საბჭოთა კავშირის დაშლის შემდეგ წამოწეულ კონფლიქტებს შორის ერთმანეთს ყველაზე მეტად 2008 წლის საქართველო-რუსეთის ომი და ყირიმის ანექსია ჰგავს, ის, რასაც დღეს ჰიბრიდულ ომს ვუწოდებთ“, - ამბობს შეერთებული შტატების თავდაცვის მდივნის მეორე მოადგილე.