მთავრობის ადმინისტრაცია ამერიკის სახელმწიფო მდივნის ჯონ კერის ვიზიტთან დაკავშირებით განცხადებას ავრცელებს. როგორც ”ინტეპრესნიუსს” მთავრობის ადმინისტრაციიდან აცნობეს, ხვალ საქართველოს ოფიციალური ვიზიტით ამერიკის სახელმწიფო მდივანი ჯონ კერი ეწვევა.
მათივე ინფორმაციით, ხვალ, 14:00 საათზე, საქართველოს მთავრობის ადმინისტრაციაში, პრემიერ-მინისტრი გიორგი კვირიკაშვილი პირისპირ შეხვდება ამერიკის სახელმწიფო მდივანს, ჯონ კერის. შეხვედრის დასრულების შემდეგ გაიმართება საქართველო-ამერიკის სტრატეგიული ქარტიის პლენარული სხდომა, რომელსაც საქართველოს პრემიერ-მინისტრი და აშშ-ს სახელმწიფო მდივანი უხელმძღვანელებენ. აღნიშნული ქარტია მოიცავს თანამშრომლობის ფართო სპექტრს სხვადასხვა სფეროში. შედგება ურთიერთთანამშრომლობის მემორანდუმზე ხელმოწერის ცერემონია.
15:30 საათზე, საქართველოს პრემიერ-მინისტრი გიორგი კვირიკაშვილი და აშშ-ს სახელმწიფო მდივანი ჯონ კერი მედიისთვის ერთობლივ განცხადებებს გააკეთებენ.
