უახლოეს დღეებში ჩქაროსნული მაგისტრალის სამტრედია-გრიგოლეთის 11-კილომეტრიანი მონაკვეთი გაიხსნება. როგორც“ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს , მინისტრის პირველმა მოადგილემ ილია დარჩიაშვილმა და ევროკავშირის ელჩმა იანოშ ჰერმანმა ჩქაროსნული ავტომაგისტრალის სამტრედია-გრიგოლეთის მონაკვეთზე მიმდინარე სამუშაოები დაათვალიერეს.
სამინისტროს ინფორმაციით, ჩქაროსნული მაგისტრალის სამტრედია-გრიგოლეთის მონაკვეთის მშენებლობა ევროპის საინვესტიციო ბანკის ფინანსური მხარდაჭერით ხორციელდება.
როგორც სამინისტროში განაცხადეს, იანოშ ჰერმანი სამუშაოების მიმდინარეობის ტემპით კმაყოფილი დარჩა და აღნიშნა, რომ ჩქაროსნული მაგისტრალის მშენებლობა საქართველოში მიმდინარე ერთ-ერთი უმნიშვნელოვანესი პროექტია, რადგან ის არამარტო ადგილობრივ მოსახლეობას გაუადვილებს გადაადგილებას, არამედ საქართველოს საგზაო სისტემას დანარჩენი ევროპის საგზაო სისტემასთან დააკავშირებს. ეს კი ქვეყნის ევროპასთან სწრაფ ინტერგრაციას კიდევ უფრო ხელს შეუწყობს.
„უახლოეს დღეებში სამტრედია-გრიგოლეთის 11-კილომეტრიანი მონაკვეთის გახსნა იგეგმება, რაც საშუალებას მისცემს ქვეყნის მოსახლეობას და ტურისტებს აჭარის მიმართულებით ახალი გზით კომფორტულად გადაადგილდნენ“, - აცხადებენ სამინისტროში.
