მინდა გამოვთქვა იმედი, რომ ევროკავშირის თითოეული წევრი ქვეყანა კარგად გაითავისებს იმ შედეგებს, რა შედეგიც შეიძლება მოჰყვეს ვიზალიბერალიზაციის პროცესის გაჭიანურებას, - ამის შესახებ დღეს გამართულ ბრიფინგზე საქართველოს საგარეო საქმეთა მინისტრის პირველმა მოადგილემ დავით ზალკალიანმა განაცხადა.

მისივე თქმით, მთელი ქართული დიპლომატიური რესურსი მობილიზებულია, რომ საქართველომ მიიღოს პოზიტიური გადაწყვეტილება, რაც შეიძლება მალე.

„ჩვენ ძალიან ინტენსიური კომუნიკაცია გვაქვს ევროკავშირის თითოეულ წევრ ქვეყანასთან, მათ შორის, გერმანიასთან. გუშინ შედგა პრემიერ-მინისტრის სატელეფონო საუბარი კანცლერ მერკელთან. მინდა გამოვთქვა იმედი, რომ ევროკავშირის თითოეული წევრი ქვეყანა კარგად გაითავისებს იმ შედეგებს, რა შედეგებიც შეიძლება მოჰყვეს ამ პროცესის გაჭიანურებას. არგუმენტები ჩვენი პარტნიორებისთვის კარგად არის ცნობილი. ჩვენ 24-საათიან რეჟიმში ვმუშაობთ როგორც აქ, თბილისში, ასევე საერთაშორისო მისიებისა და საელჩოების მეშვეობით ევროპულ დედაქალაქებში. მიმდინარეობს მაღალი დონის ვიზიტებიც. პრეზიდენტი იმყოფება სტრასბურგსა და ბრიუსელში და სწორედ მისი ერთ-ერთი მთავარი განსახილველი თემები ეს საკითხებია. პარლამენტის თავმჯდომარეც მიემგზავრება გერმანიაში. იქ იქნება პრემიერ-მინისტრის ვიზიტიც, მთელი ჩვენი დიპლომატიური რესურსი მობილიზებულია, რომ მივიღოთ პოზიტიური გადაწყვეტილება და ეს მოხდეს რაც შეიძლება მალე“, - განაცხადა ზალკალიანმა.

მისივე თქმით, ხვალ აღნიშნული საკითხი განიხილება ევროკავშირის მუდმივი წარმომადგენლების დონეზე. „მე არ მინდა წინასწარ მოვლენებს გავუსწრო. პროცესი არ დასრულებულა, ხვალ არის მუდმივი წარმომადგენლების დონეზე განხილვა. იმედი მაქვს, იქნება პოზიტიური განხილვა. შემდეგ საკითხი გადაეცემა შინაგან საქმეთა და იუსტიციის მინისტრების შეხვედრას, რომელიც 10 ივნისს გაიმართება. ეს შეხვედრა იქნება ერთ-ერთი მნიშვნელოვანი ეტაპი და სწორედ ამ შეხვედრაზე გახდება ცნობილი ის დრო, რომელშიც შესაძლებელია იყოს მიღებული გადაწყვეტილება. მე ერთი წუთითაც არ ვუშვებ იმის შესაძლებლობას, რომ საქართველოს არ მიეცემა ვიზალიბერალიზაცია. პირიქით, დარწმუნებული ვარ, რომ საქართველო აუცილებლად მიიღებს, უბრალოდ, ეს არის დაკავშირებული ბევრ ფაქტორთან“, - განაცხადა ზალკალიანმა.

რაც შეეხება ”ბილდში” გუშინ გამოქვეყნებულ სტატიას, ზალკალიანმა მოუწოდა ჟურნალისტებს, რომ ცალკეული პოლიტიკოსების განცხადებებს ნუ წარმოაჩენენ ქვეყნის პოზიციად. „რაც შეეხება სტატიას, რომელიც გუშინ ფიგურირებდა, მინდა მოგიწოდოთ ჟურნალისტებს, რომ ხშირად ნუ წარმოაჩენთ ცალკეული პოლიტიკოსების გამონათქვამებს ქვეყნის პოზიციად“, - განაცხადა საქართველოს საგარეო საქმეთა მინისტრის პირველმა მოადგილემ.