არჩევნების დანიშვნასთან დაკავშირებით პრეზიდენტის განკარგულების მიმართ არსებობს ტექნიკური შენიშვნები, რომელსაც რატომღაც დიდი პოლიტიკური მნიშვნელობა ენიჭება, - ამის შესახებ უმრავლესობის წევრი გედევან ფოფხაძე საუბრობს.

პრეზიდენტის მიერ გამოცემული განკარგულების გამოქვეყნებასთან და მის ამოქმედებასთან დაკავშირებულ გაუგებრობაში ფოფხაძე საკანონმდებლო ხარვეზს ხედავს და მისი გამოსწორების საჭიროებაზე მიუთითებს.

“თუკი შევთანხმდებით, რომ აქ არის ტექნიკური ხარვეზი, მისი გამოსწორება პრობლემას არ წარმოადგენს. მიმაჩნია, რომ თავისთავად პოლიტიკურად და სამართლებრივად უნდა არსებობდეს მექანიზმი, რომელიც მოგვცემს საშუალებას, არჩევნების თარიღის განსაზღვრა მოხდეს გარკვეული დროით უფრო ადრე, ვიდრე წინასაარჩევნო კამპანია დაიწყება. თუ აქ სამართლებრივი ხარვეზი არის, მის გამოსწორებაზე უნდა ვიფიქროთ“, - განუცხადა ჟურნალისტებს გედევან ფოფხაძემ.

პრეზიდენტის განკარგულებით, რომელიც პრემიერს კონტრასიგნაციისთვის უკვე გადაეგზავნა, საპარლამენტო არჩევნები 8 ოქტომბერს იმართება. განკარგულების ძალაში შესვლის თარიღად მითითებულია 8 აგვისტო.

ამასთან, საარჩევნო კანონმდებლობის გათვალისწიებით, აღნიშნული დოკუმენტის გამოქვეყნებისთანავე წინასაარჩევნო რეჟიმზე გადასვლა ხდება.