პრეზიდენტმა გიორგი მარგველაშვილმა დიდი ხანია უნდა იცოდეს, რომ მისი გამოსვლა რიგითი მოქალაქეების განცხადებებისგან მნიშვნელოვნად განსხვავდება და აქვს სხვა პასუხისმგებლობა, - ასე ეხმაურება “ერთიანი ნაციონალური მოძრაობის“ ერთ-ერთი ლიდერი, დეპუტატი მიხეილ მაჭავარიანი პრეზიდენტის განმარტებას საპარლამენტო არჩევნებთან დაკავშირებით გამოცემული განკარგულების ამოქმედების თარიღად 8 აგვისტოს განსაზღვრის შესახებ.
როგორც მაჭავარიანმა “ინტერპრესნიუსს“ განუცხადა, “ნაციონალური მოძრაობა“ პრეზიდენტის მიერ საპარლამენტო არჩევნების დანიშვნის გადაწყვეტილებას მიესალმა და ჰქონდათ მხოლოდ ერთი კრიტიკული შენიშვნა იმასთან დაკავშირებით, რომ კონსულტაციები არ გაიმართა.
“ნორმები, რომლებიც ძალაში შედიოდა ადმინისტრაციული რესურსის შეზღუდვის, პოლიტიკური პარტიებისთვის საჯარო სივრცეების უფრო მეტი გახსნილობის, საარჩევნო კომისიების ფორმირების, კვალიფიციური სუბიექტებისთვის სატელევიზიო ეთერის დათმობის კუთხით, ჩვენ გავიგეთ როგორც გზავნილი, რომ პრეზიდენტი უკვე მზად იყო ამ ყველაფრისთვის. ასე იმიტომაც გავიგეთ, რომ მანამდე საუბარი შედგა პრემიერ-მინისტრთან და გვქონდა ეჭვი, რომ მათ ამ ხარჯებზეც ილაპარაკეს და მსხვერპლზე წავიდნენ, რომ მარტო მათი ხელფასების და დანამატების ზრდა კი არ მოხდება, არამედ გაიხსნება ველი საარჩევნო კამპანიისთვისაც. ახლა როგორც ხედავთ, პრეზიდენტი დაკავებულია იმის მტკიცებით, რომ მან არ იცოდა, “ნიჩურტი“ ჰქონდა, სხვას რამეს გულისხმობდა და 8 აგვისტოს გავიგებთ, რომ 8 ოქტომბერი დადგება. მე ამას გუშინ ტაკიმასხარაობა ვუწოდე და დღესაც იგივეს ვუწოდებ. საქართველოს პრეზიდენტმა საკუთარი უფლებები და მოვალეობები ვერ გაათვიცნობიერა“, - განაცხადა მიხეილ მაჭავარიანმა.
