ენერგეტიკის სამინისტრო რუსული კომპანია ”გაზპრომისგან” მიღებულ დოკუმენტს მთავრობაზე დასამტკიცებლად წარადგენს და ხელშეკრულება ოფიციალურად ძალაში შევა.
როგორც ”ინტერპრესნიუსს” ენერგეტიკის სამინისტროში განუცხადეს, საქართველომ ”გაზპრომთან” გასაფორმებელი ხელშეკრულების საბოლოო ტექსტი შეათანხმა. რუსული კომპანია ”გაზპრომისგან” დოკუმენტი ხელმოსაწერად უკვე გადმოგზავნილია.
”მხარეებს შორის შეთანხმებულია კონტრაქტის საბოლოო ტექსტი, რაც ითვალისწინებს სომხეთში გატარებული გაზის ტრანზიტის საფასურად საქართველოს დარჩეს გატარებული გაზის 10%. დოკუმენტი გადის სამართლებრივ პროცედურებს რის შემდეგაც სამინისტრო წარადგენს მთავრობაზე დასამტკიცებლად და ხელშეკრულება ოფიციალურად ძალაში შევა”, - აცხადებენ ენერგეტიკის სამინისტროში.
რუსული კომპანია ”გაზპრომი” ქართულ მხარეს კონტრაქტის პირობების შეცვლას და სომხეთში გატარებული გაზის ტრანზიტის საფასურად ფულად ანაზღურებას სთავაზობდა.
