"პაატა ბურჭულაძის - საქართველოს განვითარების ფონდი" პირადი ცხოვრების ამსახველი კადრების გასაჯაროების გამო უკიდურეს აღშფოთებას გამოხატავს.
როგორც "ინტერპრესნიუსს" "პაატა ბურჭულაძის - საქართველოს განვითარების ფონდიდან" აცნობეს, პაატა ბურჭულაძემ ამ თემაზე სპეციალური პრესკონფერენცია გამართა. ფონდის აღმასრულებელი დირექტორი მოუწოდებს ხელისუფლებას გადადგას ქმედითი ნაბიჯები ქვეყნისა და საზოგადოების დასაცავად.
ბურჭულაძის განცხადებით, დამნაშავეებმა პასუხი უნდა აგონ კანონის სრული სიმკაცრით და ერთხელ და სამუდამოდ დასრულდეს საზოგადოებაში უმწეობისა და დაუცველობის განცდა.
"საქართველოს განვითარების ფონდი" გამოხატავს უკიდურეს აღშფოთებას პირადი ცხოვრების ამსახველი კადრების გავრცელების გამო, რამაც სერიული ხასიათი მიიღო. მსგავსი ქმედებები მიმართულია საქართველოს სახელმწიფოებრიობის წინააღმდეგ, ქვეყანაში იწვევს ქაოსს, ფსიქოლოგიური ტერორის ქვეშ ამყოფებს ჩვენს მოქალაქეებს და სერიოზულ საფრთხეს უქმნის საქართველოს საერთაშორისო რეპუტაციას. ხელისუფლება ვერ ახერხებს უსაფრთხოების უზრუნველყოფას, ვერ ან არ დგამს ქმედით ნაბიჯებს ქვეყნისა და საზოგადოების დასაცავად. კატეგორიულად მოვითხოვთ ხელისუფლებისგან - დამნაშავეებმა პასუხი აგონ კანონის სრული სიმკაცრით და ერთხელ და სამუდამოდ დასრულდეს საზოგადოებაში უმწეობისა და დაუცველობის განცდა", -განაცხადა პაატა ბურჭულაძემ.
