აშშ აღმოსავლეთ ევროპაში ჯავშანსატანკო ბრიგადას განალაგებს. ინფორმაცია ამის შესახებ პენტაგონის ოფიციალურ ვებგვერდზე გამოქვეყნდა.
ვაშინგტონის გადაწყვეტილებით, ეს იქნება პასუხი რუსეთის "აგრესიაზე" აღმოსავლეთ ევროპასა და ნატო-ს სხვა ქვეყნებში.
ევროპაში განლაგდება 4 200 სამხედრო, 2500 ტანკი, ჰაუბიცები, საბრძოლო ტექნიკა და 1 700 სატრანსპორტო საშუალება. ტექნიკის ნაწილი განლაგდება გერმანიაში, ბელგიასა და ნიდერლანდებში.
"ამ გზით ჩვენ განგავრძობთ ნატო-ს მოკავშირეებისა და პარტნიორების მხარდაჭერის სტრატეგიას და ვუზრუნველყოფთ მტკიცე და დაბალანსებულ მოქმედებებს რუსეთის აგრესიულობის გათვალისწინებით აღმოსავლეთ ევროპასა და სხვაგან", - განაცხადა ევროპაში აშშ-ის შეიარაღებული ძალების მეთაურმა ფილიპ ბრიდლავმა.
მისი თქმით, ჯავშანსატანკო ბრიგადის აღმოსავლეთ ევროპაში დისლოცირება 2017 წლის თებერვალში დაიწყება.
ცალკეული ქვედანაყოფები გათავსდება როტაციული პრინციპით ნატო-ს სხვადასხვა ქვეყნებში.
პენტაგონი ჯერჯერობით არ აკონკრეტებს, თუ რომელ ქვეყნებზეა საუბარი, თუმცა, როგორც დასავლური მედია წერს, ეს შესაძლოა ბალტიისპირეთის ქვეყნები, პოლონეთი, რუმინეთი და ბულგარეთი იყოს.
ახალი ბრიგადის განთავსების შემდეგ ევროპაში აშშ-ის ჯარების საერთო რაოდენობა სამ ბრიგადას მიაღწევს.
