ვფიქრობ, "ქართული ოცნება" ოქტომბრის არჩევნებში აუცილებლად დამარცხდება, - ამის შესახებ "ერთიანი ნაციონალური მოძრაობის" წევრმა გიორგი ვაშაძემ საპარლამენტო არჩევნებში "ქართული ოცნების" შანსებთან დაკავშირებით დასმული კითხვის საპასუხოდ ჟურნალისტებს განუცხადა.
მისივე განმარტებით, პარტიის დამარცხების მიზეზი რამდენიმეა, მათ შორის, პირველი შეუსრულუბელი დაპირებებია.
"ქართულმა ოცნებამ" არც ერთი დაპირება არ შეასრულა. ქვეყანა ყოველდღიურად პრობლემის წინაშეა, უფრო მეტი გაჭირვებული ადამიანი გვყავს, ვიდრე გვყავდა. ეს არის აბსოლუტურად ეკლექტური გაერთიანება, სადაც ბევრი პრორუსულად განწყობილი ადამიანი გვყავს. რაღაც ნაწილი ევროპული ორიენტაციის მქონე ადამიანია. გარდა ამისა, მათ არ აქვთ არანაირი განცდა, რომ აშენებენ საკუთარ სახელმწიფოს, მათი ხელისუფლების წყარო არის ბიძინა ივანიშვილი და მისი ფული და არა ხალხი და ხალხის მხარდაჭერა. აქედან გამომდინარე, ასეთ პოლიტიკურ ძალას პერსპექტივა არ აქვს. ვფიქრობ, ისინი დამარცხდებიან. დამარცხებისთანავე საერთოდ დავივიწყებთ, რომ "ქართული ოცნება", როგორც პოლიტიკური მოძრაობა არსებობდა", - განაცხადა გიორგი ვაშაძემ.
