რუსთავში დღეს "ქართული ოცნება - დემოკრატიული საქართველოს" საოლქო კონფერენცია ჩატარდა. კონფერენციას "ქართული ოცნების" გენერალური მდივანი კახა კალაძე, პარტიის აღმასრულებელი მდივანი ირაკლი კობახიძე და ქვემო ქართლის გუბერნატორი პაატა ხიზანაშვილი დაესწრნენ.
კონფერენციაზე "ქართული ოცნების" რუსთავის ორგანიზაციის თავმჯდომარედ რუსთავის მერი დავით ჯიქია აირჩიეს. დღესვე აირჩიეს "ქართული ოცნების" საოლქო ორგანიზაციის ბიუროს ხუთი წევრი და ყრილობის შვიდი დელეგატი რუსთავიდან.
ვიცე-პრემიერმა და "ქართული ოცნების" გენერალურმა მდივანმა კახა კალაძემ დამსწრე საზოგადოებას პარტიის მუშაობის ერთგვარი ანგარიში წარუდგინა. "ქართული ოცნების" აღმასრულებელმა მდივანმა ირაკლი კობახიძემ კი აპრილში, "ქართული ოცნების" ყრილობის ჩატარების შემდეგ, საარჩევნო კამპანიის დაწყება დააანონსა.
კახა კალაძის განცხადებით, საოლქო კონფერენციებს ,,ქართული ოცნება-დემოკრატიული საქართველო" დღეს ასრულებს. "პარტიაში რა თქმა უნდა, ახალი სახეები იქნება, ახალი სისხლი იქნება, ეს არის ძალიან მნიშვნელოვანი და ვინ იქნებიან ეს ადამიანები, ვინ გაწევრიანდება პარტიაში, რამდენიმე დღეში ჩვენ ამაზეც გავაკეთებთ განცხადებას", - აღნიშნა კახა კალაძემ.
მისივე თქმით, საპარლამენტო არჩევნებში "ქართული ოცნება" ისევ კოალიციის სახით მიიღებს მონაწილეობას თუ ცალ-ცალკე პარტიების სახით, ამაზე გადაწყვეტილება კოალიციაში ერთობლივად იქნება მიღებული. "მე სულ ვამბობდი 2012 წლიდან მოყოლებული, რომ ოდესღაც კოალიცია დაიშლება, ეს არის ნორმალური პროცესი, აქ ტრაგედია არაფერი არ არის. ვფიქრობ, ეს არის დემოკრატიისკენ წინ გადადგმული ნაბიჯი. ცუდი არ იქნება, თუ ყველა პარტია დამოუკიდებლად მიიღებდა მონაწილეობას და მერე უკვე პარლამენტში მივიღოთ გადაწყვეტილება, შეიქმნება თუ არა კოალიცია. ეს ჩემი სუბიექტური მოსაზრებაა, თუმცა ბატონ პრემიერ-მინისტრთან კოალიციურ რეჟიმში ამაზე საუბარი აუცილებლად იქნება", - განაცხადა კახა კალაძემ.
