"თავისუფალი დემოკრატების" ლიდერი, ირაკლი ალასანია პირადი ცხოვრების ამსახველი ფარული ვიდეომასალის საქმესთან დაკავშირებით, სპეციალური საგამოძიებო კომისიის შექმნას მხარს უჭერს.
როგორც ირაკლი ალასანიამ შესაბამისი კითხვის საპასუხოდ განაცხადა, ის უერთდება არასამთავრობო ორგანიზაციების, კონკრეტულად კი კამპანია "ეს შენ გეხებას" ინიციატივას.
"მართლაც უნდა შეიქმნას საგამოძიებო სპეციალური სამასახური, კომისია, ნებისმიერი ფორმით. მთავარია, რომ ეს იყოს მართლაც დამოუკიდებელი და ის სისტემური დანაშაულებები, რასაც ჰქონდა ადგილი, გამოძიებული უნდა იყოს. პროკურატურა არის სწორედ პასუხისმგებელი იმისთვის, რომ აქამდე ვერ მოხდა ეს გამოძიებები. როგორც მაშინ განადგურებული კადრების შემდეგ პროკურატურა საზოგადოებას, ამ ყველაფრის 5 თვეში გამოძიებას დაჰპირდა და ასევე ახლა გავრცელებული კადრების გამოძიება - არც ერთი ბოლომდე არ არის მიყვანილი", - განაცხადა ირაკლი ალასანიამ.
მისივე თქმით, უფრო ღია, გამჭვირვალე და შესაბამისი საპარლამენტო კონტროლის პირობებში უნდა მოქმედებდეს ქვეყნის სპეცსამსახურები.
"ის არ უნდა იყოს ჯიბის, ან კერძო სპეცსამსახური. უნდა იყოს ქვეყნის ეროვნული უსაფრთხოების სამსახურში და არა - არაფორმალური მმართველის. სწორედ ამიტომ ვუჭერთ მხარს საპარლამენტო ზედამხედველობისა და საზოგადოებრივი ზედამხედველობის გაძლიერებას", - განაცხადა ირაკლი ალასანიამ.
