პარლამენტის ჯანდაცვის კომიტეტს სუროგაციის გზით დაბადებული ბავშვის საქართველოდან გაყვანის თაობაზე მთავრობის საკანონმდებლო ინიციატივასთან დაკავშირებით შენიშვნები აქვს.
კომიტეტის პოზიცია პარლამენტს დეპუტატმა დარეჯან ჩხეტიანმა კანონპროექტის პირველი მოსმენით განხილვისას გააცნო.
კერძოდ, კომიტეტს არასწორად მიაჩნია, სუროგაციასთან ექსტრაკორპორული განაყოფიერების გაიგივება და იუსტიციის სამინისტროსგან (პროექტის ავტორი) კანონპროექტიდან ტერმინ "ექსტრაკორპორული განაყოფიერების" ამოღებას ითხოვს.
როგორც ამასთან დაკავშირებით პლენარულ სხდომაზე დარეჯან ჩხეტიანმა განმარტა, ექსტრაკორპორული განაყოფიერება დამატებითი რეპროდუქციული ტექნოლოგიაა, რომლის გამოყენებითაც ხდება განაყოფიერებული კვერცხუჯრედის, ემბრიონის ბიოლოგიური დედის საშვილოსნოში გადატანა და მხოლოდ მცირე შემთხვევებში - დაახლოებით 5%-7%-ში ხდება ემბრიონის სუროგატი დედის საშვილოსნოში გადატანა. მისივე თქმით, სუროგაცია ეს ის პროცესია, რომლის დროსაც ქალი ინ-ვიტრო განაყოფიერების გზით, იპლანტაციური ემბრიონის ტრანსფერის შედეგად ორსულდება, ბავშვის შემდგომ პოტენციური მშობლებისათვის გადასაცემად.
"შესაბამისად, არ შეიძლება მოხდეს სუროგაციის და ექსტრაკორპორული განაყოფიერების ერთმანეთთან გაიგივება", - განაცხადა დარეჯან ჩხეტიანმა.
გარდა ამისა, პარლამენტის ჯანდაცვის კომიტეტის კიდევ ერთი შენიშვნა არის ის, რომ კომიტეტის შეფასებით, რეგულირების მიღმა რჩება შემთხვევა, როცა ხელშეკრულების საფუძველზე, სუროგაციის გზით დაბადებული ბავშვის მოწმობაში მშობლად ჩასაწერი პირებიდან ერთ-ერთი ბავშვზე უარს აცხადებს, მაგრამ მეორე პირი ბავშვის გენეტიკური მშობელია. ჩხეტიანის თქმით, ასეთ შემთხვევაში მშობლის სტატუსი ერთ-ერთ პირს უნდა მიენიჭოს.
პარლამენტი, პირველი მოსმენით, "საქართველოს მოქალაქეების საქართველოდან გასვლისა და საქართველოში შემოსვლის წესების შესახებ" კანონში დაგეგმილი ცვლილებების პროექტს იხილავს, რომელიც სუროგაციის გზით დაბადებული ბავშვის საქართველოდან გაყვანის კონტროლის დამატებით მექანიზმს ადგენს. კერძოდ, პროექტის მიხედვით, ამ კატეგორიის ბავშვის საქართველოდან გასვლა მხოლოდ იმ შემთხვევაში იქნება შესაძლებელი, თუ მის დაბადების სამოქალაქო აქტის ჩანაწერში ბავშვის ორივე მშობელი იქნება მითითებული.
კანონპროექტში ნათქვამია, რომ სუროგაციის გზით დაბადებული ბავშვის საქართველოდან გასვლის წესი იუსტიციისა და შინაგან საქმეთა მინისტრების ერთობლივი ბრძანებით განისაზღვრება.
კანონში გამოყენებულ ტერმინებთან დაკავშირებით ანალოგიური შენიშვნები გამოთქვეს იურიდიულ საკითხთა და ადამიანის უფლებათა დაცვის კომიტეტების თავმჯდომარეებმა.
