ევროპის საფეხბურთო ჩემპიონატის მატჩების ჩატარების ადგილი, შესაძლოა, ტერორიზმის საფრთხის გამო შეიცვალოს. ამის შესახებ "ესოშიეტედ პრესი" წერს.
გავრცელებული ცნობით, თუ საჭირო გახდა, შესაძლოა, შეიცვალოს ჩემპიონატის ჩატარების თარიღიც ან იგი მაყურებლების გარეშე ჩატარდეს. შესაბამისი საკითხი დღის წესრიგში მას შემდეგ დადგა, რაც გასული წლის ნოემბერში თვითმკვლელმა ტერორისტებმა საფრანგეთსა და გერმანიას შორის ამხანაგური მატჩის დროს "სტად დე ფრანსზე" შესვლა სცადეს. მათ სტადიონის გარეთ ასაფეთქებელი მოწყობილობა პარიზში ორგანიზებული ტერაქტების ფარგლებში გაააქტიურეს. პარიზის ტერაქტების შემდეგ საფრანგთში საგანგებო მდგომარეობა გამოცხადდა, იგი 26 მაისამდე შენარჩუნდება.
"შესაძლოა, მატჩები გადაიდოს უსაფრთხოების მიზნით ან ტერორისტული თავდასხმების რისკების გამო. თუ უსაფრთხოებისთვის აუცილებელი იქნება, შესაძლოა, მატჩი გულშემატკივრების გარეშე ჩატარდეს. თუმცა, ამ დროისთვის ექსტრემიზმის საფრთხისა და განგაშის ნიშნები არ არსებობს", - განაცხადა უეფა-ს საშეჯიბრო კომიტეტის დირექტორმა, მარტინ კალენმა.
ევროპის საფეხბურთო ჩემპიონატი 10 ივნისს საფრანგეთში დაიწყება და 10 ივლისამდე გაგრძელდება. 32 დღის განმავლობაში 51 თამაში შედგება 10 სხვადასხვა სტადიონზე.
