თინა ხიდაშელთან საქმეებს, ტენდერებს ვერ ჩააწყობ, - ამის შესახებ თავდაცვის მინისტრმა თინა ხიდაშელმა განაცხადა, როდესაც უპასუხა "რუსთავი 2"-ის გადაცემა "არჩევანის" წამყვანის შეკითხვას, ხომ არ უკავშირდება თავდაცვის მინისტრთან გოგი თოფაძის დაპირისპირება თავდაცვის სამინისტროს მიერ გამოცხადებულ ტენდერში თოფაძის კომპანიის დამარცხებას.
"ორი წლის განმავლობაში ქართულ ჯარს არაალკოჰოლური სასმელით გოგი თოფაძის კომპანია ამარაგებდა. როგორც სახელმწიფო შესყიდვების სააგენტოს ოფიციალური დოკუმენტშია აღნიშნული, გოგი თოფაძის კომპანიამ 2014 წელს ტენდერიდან თითქმის 880 ათასი ლარი მიიღო. 2015 წელს კი თითქმის 420 ათასი ლარი. ამასთან, საინტერესოა, რომ 2015 წლის სატენდერო განაცხადში "ყაზბეგის" კონკურენტ კომპანიას 420 ათასი ლარი აქვს მითითებული, ყაზბეგს კი მხოლოდ 10 ლარით ნაკლები - 41999000, რაც, ცხადია, დამატებით კითხვებს აჩენს.
2016 წელს კომპანია "ყაზბეგმა" საქართველოს თავდაცვის სამინისტროს მიერ გამოცხადებული ტენდერში წააგო და არაალკოჰოლური სასმელით ქართულ ჯარს მიმდინარე წელს უკვე სხვა კომპანია ამარაგებს", - აღნიშნა გიორგი გაბუნიამ და დაინტერესდა, ხომ არ არის კავშირი წაგებულ ტენდერსა და ზუსტად ერთ თვეში გოგი თოფაძის მიერ თავდაცვის მინისტრის წინააღმდეგ დაწყებულ კამპანიას შორის.
"შეიძლება ის, რომ მისმა კომპანიამ ვერ მოიგო ტენდერი, გამხდარიყო მიზეზი იმისა, რომ ის ასე მძაფრად დაგიპირისპირდათ?", - მიმართა "არჩევანის" წამყვანმა თინა ხიდაშელს.
"მე ამის შესახებ საერთოდ არ ვიცოდი. ტენდერებზე ინფორმაცია მაინც და მაინც არ მაქვს. ეს ჩემთვის სიახლეა. მე არ ვიცი ამის შესახებ და არ შემიძლია დაგიდასტურთ. .. მან ალბათ იცის ამის შესახებ. ეს არ არის იმ მასშტაბის თანხები, რომ გამხდარიყო ამ ყველაფრის მიზეზი. თუმცა, როდესაც გროვდება პრეტენზიები, ამანაც შეიძლება ითამაშოს თავისი როლი", - განაცხადა თავდაცვის მინისტრმა.
გიორგი გაბუნია ასევე დაინტერესდა, ამ საკითხზე თავდაცვის მინისტრი გოგი თოფაძეს ესაუბრა თუ არა.
"მე ასეთ თემებზე ვერავინ დამელაპარაკება. ეს, იცის ყველამ, ვინც მიცნობს... ჩემთან საქმეებს ვერ ჩააწყობენ. ასეთი ადამიანი ვარ, ზოგადად. ამით ბევრ ადამიანს გავანაწყენებ ხოლმე, მაგრამ, თინა ხიდაშელთან საქმეებს ვერ ჩააწყობენ", - აღნიშნა თავდაცვის მინისტრმა.
