თუკი ლაპარაკია ქართული ტრადიციების დაცვაზე, დაიცვან ქართული ტრადიცია, როგორც 1921 წლის კონსტიტუცია, დაიცვან ქართული ტრადიცია, როგორც ილია ჭავჭავაძის სწრაფვა ევროპისაკენ და როგორც სულხან-საბას დიპლომატია, - აღნიშნული განცხადება საქართველოს პრეზიდენტმა გიორგი მარგველაშვილმა გუშინ, თბილისის მოსწავლე-ახალგაზრდობის სასახლეში, საქართველოს დემოკრატიული რესპუბლიკის 1921 წლის კონსტიტუციის 95 წლისთავისადმი მიძღვნილ ღონისძიებაზე გააკეთა. 

გიორგი მარგველაშვილმა ხაზგასმით აღნიშნა, რომ როდესაც საქართველოს კონსტიტუცია იხილებოდა, მის პარალელურად, შულავერში, საქართველოს სახელმწიფიებრობის განადგურება მზადდებოდა. 

"95 წლის წინ, ჩვენი წინაპრები აქ, ამ დარბაზში, სახელმწიფოს მმართველობის, ერისა და ქვეყნის განვითარების უმნიშველოვანეს პრინციპს ადგენდნენ. ეს არის დაწერილი პრინციპი – კონსტიტუცია. მაშინ, როდესაც ჩვენი წინაპრები საქართველოს კონსტიტუციას ადგენდნენ, - ერთ-ერთს ყველაზე პროგრესულს და ევროპულს მაშინ, კონსტიტუციას, რომლის შინაარსში პრინციპული და დომინანტურია ადამიანის უფლებები, არის ხელისუფლების დაყოფა, არის უმცირესობების უფლებები, როდესაც ისინი ამ კონსტიტუციას წერდნენ აქვე, გვერდით, შულავერში, იყვნენ ადამიანები, რომლებიც ფიქრობდნენ და ემზადებოდნენ იმისთვის, რომ დამოუკიდებელი ქართული სახელმწიფო დაენგრიათ და გაენადგურებინათ. მაშინ მოტივაცია ძალიან ნათელი იყო – საქართველო, როგორც დამოუკიდებელი, უნიკალური, ძალიან სპეციფიური კულტურით, თავისი ღრმა ისტორიული წარსულით რომ უნდა გამხდარიყო ევროპული ოჯახის წევრი, იყო სხვა ტენდენცია, რომ ეს ყველაფერი გადახარშულიყო ერთიან, დიდ პროლეტარიატის ცეცხლში და დაგვეკარგა ჩვენი იდენტობა, ჩვენი თვითმყოფადობა, ჩვენი სახელწიფოებრიობა. რა თქმა უნდა, ეს ასე არ მოხდა და ჩვენ შევინარჩუნეთ ჩვენი ქვეყანა ისე, როგორც ამას ყოველლთვის ვაკეთებდით", - განაცხადა გიორგი მარგველაშვილმა.

ამასთან, პრეზიდენტის თქმით, როცა ქართული სახელმწიფო ხელახლა გახდა დამოუკიდებელი და 1995 წელს კონსტიტუცია მიიღო, ახალი უზენაესი კანონი ტრადიციის გაგრძელება იყო. 

"ჩვენი წარსულია საქართველოს დამოუკიდებლობა და ის მომენტი, როცა ჩვენ ნათლად დავინახეთ, რომ ევროპული კულტურის სახელმწიფო ვართ – ჩვენი წარსულია სულხან-საბა, ჩვენი წარსულია დავით აღმაშენებელი, ვაჟა-ფშაველა და ილია ჭავჭავაძე. მოვუწოდებ ყველას, რომ ძალიან ფართოდ გააღონ თვალები და თვალი ამ წარსულს გაუსწორონ. თვალი გაუსწორონ მზერას, რომელიც ნათლად არის ორიენტირებული ევროპაზე, ევროპულ ღირებულებებზე და თუკი ლაპარაკია ქართული ტრადიციების დაცვაზე, სწორედ აქ დაიცვან საქართველო – დაიცვან ქართული ტრადიცია, როგორც 1921 წლის კონსტიტუცია, დაიცვან ქართული ტრადიცია, როგორც ილია ჭავჭავაძის სწრაფვა ევროპისაკენ, დაიცვან ქართული ტრადიცია, როგორც სულხან საბას დიპლომატია", - განაცხადა პრეზიდენტმა. 

საზეიმო ღონისძიება პრეზიდენტთან ერთად საკონსტიტუციო სასამართლოს თავმჯდორემ გიორგი პაპუაშვილმა გახსნა. მიწვეულ სტუმრებს ასევე მიმართა ნოე ჟორდიანიას შვილიშვილმა, ლევილის ქართული კერის მმართველმა ირენ ციციშვილმა.