"ერთიანი ნაციონალური მოძრაობის" ლიდერი გიგი წერეთელი ამერიკის სახელმწიფო დეპარტამენტში გაკეთებულ განცხადებას ეხმაურება.
როგორც "ინტერპრესნიუსს" "ნაციონალური მოძრაობიდან" აცნობეს, გიგი წერეთელი ამერიკის სახელმწიფო დეპარტამენტში გაკეთებულ იმ განცხადებას გამოეხმაურა, რომლის თანახმადაც საქართველოსთვის ამ საარჩევნო წელს მედიათავისუფლება და პოლიტიკური პლურალიზმი სასიცოცხლოდ მნიშვნელოვანია.
"გუშინ დავბრუნდით შეერთებული შტატებიდან, სადაც ძალიან ბევრი შეხვედრა გვქონდა. სწორედ ეს თემებია დღეს ძალიან საინტერსო და მნიშვნელოვანი ჩვენი პარტნიორი ქვეყნისთვის და მისი ხელისუფლებისთვის. ის პროცესები, რომელიც საქართველოში მედიათავისუფლების თვალსაზრისით ვითარდება - "რუსთავი 2", პოლიტიკური თოქშოუების დახურვა, "მაესტროში" არსებული ვითარება; ასევე, მზადება საარჩევნო პროცესისათვის, რაც ხელისუფლების მხრიდან სასამართლოზე გავლენის მოპოვებას გულისხმობს; საარჩევნო ადმინისტრაციების პარტიული აქტივის პრინციპით დაკომპლექტება; პოლიტიკური ოპონენტების საპატიმროში ყოფნა და ოპოზიციის დევნა; იმ წინადადებების იგნორირება, რასაც ოპოზიცია საკონსტიტუციო ცვლილებების თვალსაზრისით საარჩევნო სისტემასთან დაკავშირებით აკეთებს და ასე შემდეგ, ნამდვილად არ ქმნის თავისუფალ საარჩევნო გარემოს და ვიქრობთ, რომ ეს ძალიან სერიოზულ ჩრდილს აყენებს საქართველოს რეპუტაციას, საქართველოში დემოკრატიული პროცესის განვითარებას", - განაცხადა გიგი წერეთელმა.
