ნუთუ მედიასაშუალებების თემა ქვეყნის პრეზიდენტის დღის წესრიგში მხოლოდ მაშინ უნდა დადგეს, როცა სასამართლოში ერთ-ერთი პოლიტიკური პარტიის ნაწილის საკუთრების საკითხი განიხილება?! - ამის შესახებ პარლამენტის ტრიბუნიდან პრეზიდენტ გიორგი მარგველაშვილის მისამართით ფრაქცია "ქართული ოცნების" თავმჯდომარემ გია ვოლსკიმ განაცხადა.
დეპუტატის თქმით, არც პირადად მას და არც ერთ მის კოლეგას პრობლემა არ აქვს, ითანამშრომლოს თუნდაც იმ მედია-საშუალებასთან, რომლის ხელმძღვანელი მთავრობას ჯოჯოხეთის მოწყობას ჰპირდება.
"ჩვენ მეხოტბე მედია არ გვჭირდება. საქართველოში და მის ფარგლებს გარეთ არ მეგულება არც ერთი მედია-საშუალება, რომელიც არა თუ ხოტბას ასხამს საქართველოს ამჟამინდელ ხელისუფლებას, არამედ რომელიმე მიმდინარე ან დასრულებულ წარმატებულ პროექტს. ასეთი ასეულობითაა ინფრასტრუქტურულ, სამედიცინო, საგანმანათლებლო, სასამართლო, სასჯელაღსულების და სხვა სფეროებში. მეხოტბე მედია მართლაც არ გვჭირდება, მაგრამ ნუთუ მედია-საშუალებების თემა მხოლოდ მაშინ უნდა დადგეს ქვეყნის პრეზიდენტის დღის წესრიგში, როცა ერთ-ერთი მისი წარმომადგენლის, ფაქტიურად ერთ-ერთი პოლიტიკური პარტიის ნაწილის საკუთრების საკითხი განიხილება სასამართლოში?!
არც პირადად მე და არც ჩემი რომელიმე კოლეგა ვერავითარ პრობლემას ვერ ხედავს იმაში, რომ ითანამშრომლოს ნებისმიერ მედია-საშუალებასთან, მათ შორის მასთან, რომლის ხელმძღვანელი ჯოჯოხეთის მოწყობას გვპირდება და ფრიად საეჭვო დიალოგებს აწარმოებს უკრაინაში მყოფ პოლიტიკურ ლიდერთან, დესტაბილიზაციისთვის საჭირო მეთოდებთან დაკავშირებით", - განაცხადა გია ვოლსკიმ.
უმრავლესობის ერთ-ერთმა ლიდერმა აქვე აღნიშნა, რომ საქართველოში მედიის თავისუფლება გარანტირებულია, იმის მიუხედავად, ამზადებს თუ არა ის მთავრობისთვის სასურველ სიუჟეტებს. ვოლსკი ამბობს, რომ ეს პოლიტიკა უცვლელია. "ამის გარანტი პრეზიდენტიცაა, თუმცა არა მთავრობის უსაფუძვლო და მუდმივი კრიტიკის ხარჯზე", - დასძინა მან.
