საქართველოს პრეზიდენტმა გიორგი მარგველაშვილმა იმედი გამოთქვა, რომ პარლამენტი ქალების კვოტირების შესახებ კანონპროექტს მხარს დაუჭერს, - ამის შესახებ პრეზიდენტმა პარლამენტში ყოველწლიური მოხსენებით გამოსვლის შემდეგ განაცხადა.
როგორც პრეზიდენტმა აღნიშნა, მის მოხსენებაში თვითმმართველობის გაღრმავებაზე აქტიური საუბარი იყო. მისივე თქმით, რეალურად თვითმმართველობის რეფორმის გაღრმავება არის გარანტი იმისა, რომ დემოკრატია ყველა დონეზე იმუშავებს.
"მეტიც, რაღაც თვალსაზრისით არის იმის გარანტიც, რომ პარლამენტის მუშაობა კიდევ უფრო ეფექტური იქნება, რადგან ბევრი საკითხი, რომელიც გადავა თვითმმართველობის დონეზე, ჩამოშორდება როგორც პარლამენტს, ასევე აღმასრულებელი ხელისუფლების ვალდებულებებს. ამ მიმართულებით მნიშვნელოვანი ნაბიჯები მისასალმებელია", - განაცხადა მარგველაშვილმა.
ქვეყნის პირველმა პირმა იმედი გამოთქვა, რომ ქალების კვოტირების შესახებ კანონპროექტი პარლამენტში გავა. "დაბოლოს მინდა კიდევ ერთხელ აღვიქვა, რომ რადგან არ იყო მძაფრი კრიტიკა, არამედ რიგ შემთხვევებში მხარდაჭერაც კი იყო, ის კანონპროექტი, რომელიც პარლამენტში შემოსულია და რომელსაც მე პოლიტიკურად აქტიურად ვუჭერ მხარს, ქალთა კვოტირების შესახებ, საკანონმდებლო ორგანოში გავა და ჩვენ უფრო მაღალი სტანდარტის გენდერულად დაბალანსებულ საკანონმდებლო ორგანოს მივცემთ მომავალ საქართველოს", - განაცხადა მარგველაშვილმა.
