უმცირესობის ფარგლებში ფრაქციის "ნაციონალური მოძრაობა-ერთიანი საქართველოსთვის" რეგისტრაციის საკითხს ბიუროს სხდომაზე კამათი მოჰყვა. "კონსერვატორი" დეპუტატი გიგა ბუკია აღნიშნულის საგაჩივრებაზეც საუბრობს.
საქმე ახალ ფრაქციას ეხება, რომელშიც "ნაციონალური მოძრაობის" ოთხი მაჟორიტარი დეპუტატი და ასევე შოთა მალაშხია და ნიკოლოზ ყიფშიძე გაერთიანდნენ.
საპროცედურო საკითხთა და წესების კომიტეტმა აღნიშნული ფრაქციის რეგისტრაციის თაობაზე პარლამენტის ბიუროს დღეს დადებითი დასკვა წარუდგინა და კამათიც ამას მოჰყვა. ახალი ფრაქციის შექმნას გიგა ბუკია დაუპირისპირდა, რომლის აზრით, ფრაქციის ფორმირებით პარლამენტის რეგლამენტი ირღვევა.
როგორც ამასთან დაკავშირებით გიგა ბუკიამ განაცხადა, ერთი პარტიული სიით არჩეულმა ერთი პარტიის წევრებმა შეიძლება მხოლოდ ერთი ფრაქცია შექმნან, ხოლო პარლამენტის წევრს, გარდა მაჟორიტარისა, თუ მისი პარტიის წევრებმა ფრაქცია შექმნეს, უფლება არა აქვს, იყოს სხვა ფრაქციის წევრი. ბუკიას თქმით, შოთა მალაშხია და ნიკოლოზ ყიფშიძე მაჟორიტარი დეპუტატები არ არიან, ისინი პარლამენტში "ნაციონალური მოძრაობის" სიით შევიდნენ და მათი მონაწილეობით ახალი ფრაქციის შექმნა რეგლამენტს ეწინააღმდეგება.
ამასთან დაკავშირებით საპროცედურო საკითხთა და წესების კომიტეტის თავმჯდომარემ გიორგი კახიანმა განმარტა, რომ მალაშხია და ყიფშიძე "ერთიან ნაციონალური მოძრაობის" საარჩევნო სიაში იყვნენ, მაგრამ იყვნენ როგორც უპარტიოები და არა როგორც "ერთიანი ნაციონალური მოძრაობის" წევრები. შესაბამისად, კახიანი თვლის, რომ ამით პარლამენტის რეგლამენტი არ ირღვევა.
საკითხს ბიუროს სხდომაზე ხანგრძლივი დებატები მოჰყვა. ბუკიამ დააყენა საკითხი, ახალი ფრაქცია არ დარეგისტრირებულიყო, თუმცა ხანგრძლივი კამათის შემდეგ მისი ეს ინიციატივა ჩავარდა და ახალი ფრაქცია ოფიციალურად დარეგისტრირდა.
"ნახავთ, ამ ლოგიკით უახლოეს ხანებში ფრაქციას გოგა ხაჩიძეც რომ შეგიქმნით", - აღნიშნა რეპლიკის სახით გიგა ბუკიამ.
