ქვეყანამ, რომელიც ნაწილობრივ ოკუპირებულია ძალიან ძლიერი მეზობლის მიერ, მაინც მიაღწია წარმატებულ შედეგებს დემოკრატიული და თავისუფალი საზოგადოების მშენებლობის გზაზე, - ამის შესახებ საქართველოს პრეზიდენტმა გიორგი მარგველაშვილმა გუშინ "ლიდერთა ფორუმის" დებატებზე სიტყვით გამოსვლისას განაცხადა. 
პრეზიდენტის ადმინისტრაციის ინფორმაციით, გიორგი მარგველაშვილმა დემოკრატიის განვითარებისა და ეფექტიანი სახელმწიფო მართვის ჩამოყალიბებაში შეტანილი წვლილისთვის სტენფორდის უნივერსიტეტის პოლიტიკის მეცნიერებების პროფესორი ფრენსის ფუკუიამა ღირსების ორდენით დააჯილდოვა. 
როგორც საქართველოს პრეზიდენტმა განაცხადა, "ლიდერთა ფორუმი" დემოკრატიის, სწორი მმართველობის მიმართულებით ევროპულ და ევროატლანტიკურ საზოგადოებასთან საქართველოს კულტურული და პოლიტიკური კავშირებისა და ურთიერთობების გაღრმავების თვალსაზრისით განსაკუთრებით მნიშვნელოვანია. 
"წელს საქართველოს დამოუკიდებლობის 25 წლისთავია, ახალი დამოუკიდებლობის, ასე ვიტყოდი, რადგან ჩვენი ერი თითქმის 3000 წლის ისტორიას ითვლის. წელს, ჩვენი ახალი სახელმწიფოს 25 წლის იუბილეა და ნათლად ვხედავთ, რომ მივაღწიეთ დამოუკიდებლობას სისტემისაგან, რომელსაც საბჭოთა კავშირი ერქვა. ჩვენ დავიწყეთ არსებობა, როგორც ახალმა დამოუკიდებელმა სახელმწიფომ და ძალიან ბევრია მისაღწევი, რომ გავხდეთ რეალურად თავისუფლები. თავისუფლება გულისხმობს იდენტიფიკაციას საკუთარ ღირებულებებთან, საკუთარ მისწრაფებასთან და გულისხმობს ისეთი სახელმწიფოს შენებას, რომლის ჩამოყალიბებაც ერის არჩევანია. ამ თვალსაზრისით, ჩვენ გრძელი გზა გვაქვს გასავლელი. გზა, რომელიც, ძალიან რთულია, განსაკუთრებით კი რუსეთის მეზობელი ქვეყნებისათვის. მაგრამ, ეს არის გზა, რომელიც არის ერთი გამოსავალი და რომელიც შეგვიძლია დემოკრატიული განვითარებით მივიღოთ, რადგან დემოკრატია ნიშნავს ზუსტად იგივეს, რასაც თავისუფლება - მოუსმინო საკუთარ ხალხს და საკუთარ საზოგადოებასთან ერთად მიიღო გადაწყვეტილება. დროდადრო ჩვენი არჩევანი გამოწვევის წინაშე დგება მეზობლების, იმ პრობლემებისა და კონფლიქტების გამო, რომლებიც ამჯერად კიდევ უფრო რთულდება ჩვენს სამეზობლოში - იქნება ეს კონფლიქტი უკრაინაში, თუ სირთულეები სირიაში. რასაკვირველია, ეს ყოველივე გავლენას ახდენს ჩვენს გზაზე ავაშენოთ წარმატებული, სტაბილური და უსაფრთხო საზოგადოება", - განაცხადა გიორგი მარგველაშვილმა. 
მისივე თქმით, ქვეყნის 25-წლიანი გამოცდილების შეჯამებისას სჯერა, რომ საქართველომ მიაღწია დიდ მიზნებსა და შესანიშნავ შედეგებს. "ქვეყანამ, რომელიც ნაწილობრივ ოკუპირებულია ძალიან ძლიერი მეზობლის მიერ, რომელსაც პრობლემები აქვს იძულებით გადაადგილებულ პირებთან და ეკონომიკურ განვითარებასთან დაკავშირებით, მაინც მიაღწია წარმატებულ შედეგებს დემოკრატიული და თავისუფალი საზოგადოების მშენებლობის გზაზე და თითოეული ჩვენგანი ამ გზის განვითარებისა და გაძლიერების ერთგულნი ვართ", - განაცხადა საქართველოს პრეზიდენტმა. 
2016 წლის თბილისის ლიდერთა ფორუმს ესწრებოდნენ საქართველოს პრემიერმინისტრი გიორგი კვირიკაშვილი, აღმასრულებელი და საკანონმდებლო ხელისუფლების წარმომადგენლები, პოლიტიკური პარტიების წარმომადგენლები, ამერიკის შეერთებული შტატების ელჩი იან კელი და დიპლომატიური კორპუსი, სამოქალაქო და ბიზნესსექტორის წარმომადგენლები.