ექსპერტ რამაზ საყვარელიძეს არ ჰგონია, რომ ყოფილ პრემიერ-მინისტრ ირაკლი ღარიბაშვილს პოლიტიკური პარტიის შექმნის სურვილი ჰქონდეს.
საყვარელიძის აზრით, ირაკლი ღარიბაშვილმა, შესაძლოა, აღმასრულებელ ან კერძო სტრუქტურებში საქმიანობის გაგრძელება მოინდომოს.
"ყველას და მათ შორის, რა თქმა უნდა, ყოფილ პრემიერსაც შეუძლია, პოლიტიკური პარტია შექმნას, უბრალოდ არა მგონია, თვითონ ღარიბაშვილს ჰქონდეს ამ ტიპის პერსპექტივის სურვილი. ვერ ჩავთვლიდი, რომ ღარიბაშვილს პოლიტიკაში კომფორტულად ყოფნა ეტყობოდა. არიან ადამიანები, ვისთვისაც ეს კომფორტია, თუმცა, ასევე, არიან ადამიანები, იგივე ბიძინა ივანიშვილი, ვისთვისაც პოლიტიკაში ყოფნა დისკომფორტს წარმოადგენს. მე მგონი, პოლიტიკაში ყოფნა ღარიბაშვილისთვისაც დისკომფორტს წარმოადგენს. ნებისმიერი პერსპექტივა იწყება ადამიანის სურვილისგან და ეს სურვილი, პოლიტიკური პარტიის შექმნის, არა მგონია რომ ღარიბაშვილს ჰქონდეს. მე მგონი, საჯარო პოლიტიკის მიმართულებით მისი კარიერა არ განვითარდება. შეიძლება აღმასრულებელ ან კერძო სტრუქტურებში მოუნდეს ყოფნა", - განაცხადა საყვარელიძემ.
რაც შეეხება პრემიერ-მინისტრის პოსტის დატოვებას, რამაზ საყვარელიძე მიიჩნევს, რომ როგორც მინიმუმ წასვლის დრო ირაკლი ღარიბაშვილის პირადი გადაწყვეტილებიდან გამომდინარეობდა.
"ბიძინა ივანიშვილმა ინტერვიუში თქვა, რომ ღარიბაშვილმა ფაქტის წინაშე დაგვაყენაო. შეიძლება იყო საუბარი იმის თაობაზე, რომ ახალი პრემიერი არის საჭირო, მაგრამ თარიღის მხრივ, როგორც ჩანს, ღარიბაშვილის გადაწყვეტილება იყო. ეს იქიდანაც ჩანს, რომ გუნდი ამ გადაწყვეტილებას მოუმზადებელი დახვდა. პროცესს არ ეტყობა წინასწარი მომზადება. ამიტომ მგონია, რომ ივანიშვილი გულახდილი იყო, როცა ეს თქვა და საახალწლოდ წასვლა მეტ-ნაკლებად ღარიბაშვილის ინიციატივა იყო", - განაცხადა რამაზ საყვარელიძემ.
