სოხუმის მარიონეტული რეჟიმი არ გამორიცხავს, რომ მომავალში სირია აფხაზეთის დამოუკიდებლობას აღიარებს. ამის შესახებ ოკუპირებული აფხაზეთის დე-ფაქტო საგარეო საქმეთა მინისტრმა ვიაჩესლავ ჩირიკბამ სააგენტო "სპუტნიკ-აბხაზია"-სთან ინტერვიუში განაცხადა.
მისი თქმით, რუსეთში სირიის ელჩთან, რიად ჰადადთან შეხვედრაზე მხარეებმა "თანამშრომლობის საკითხებსა და აფხაზეთში სირიელი აფხაზების რეპატრიაციაზე" ისაუბრეს.
"აღინიშნა ორივე მხარის დიდი დაინტერესება სირიულ-აფხაზური ურთიერთობის განმტკიცებისა და გაღრმავების კუთხით. გამოიწვევს თუ არა ეს, საბოლოო ჯამში, აფხაზეთის აღიარებას - ჩემი მოსაზრებით, ამაში შეუძლებელი არაფერია. თუმცა რა თქმა უნდა, ეს სირიული მხარის სუვერენული გადაწყვეტილებაა" , - განაცხადა ჩირიკბამ.
მარიონეტული რეჟიმის წარმომადგენელმა ასევე უარყო ინფორმაცია იმის შესახებ, რომ ე.წ. "აფხაზეთის მოქალაქეები" "ისლამური სახელმწიფოს" რიგებში გაწევრიანდნენ. მისი თქმით, აღნიშნული ინფორმაცია სიმართლეს არ შეესაბამება.