საქართველოს პრემიერ-მინისტრის ირაკლი ღარიბაშვილის განცხადებით, ევროკომისართან იოჰანეს ჰანთან შეხვედრაზე საუბარი, საქართველოსთვის სავიზო რეჟიმის ლიბერალიზაციის მნიშვნელობას შეეხო.
როგორც პრემიერმა შეხვედრის შემდეგ გამართულ პრესკონფერენციაზე განაცხადა, ხელისუფლებამ ძალისხმევა არ დააკლო, რათა ყველა ნაკისრი ვალდებულება, რომელიც გათვალისწინებული იყო სავიზო რეჟიმის ლიბერალიზაციის სამოქმედო გეგმის ფარგლებში, შეესრულებინა.
"ჩვენ ხაზი გავუსვით სავიზო რეჟიმის ლიბერალიზაციის მნიშვნელობას ჩვენი ქვეყნისთვის, მოსახლეობისთვის. ესაა უდიდესი საკითხი, რომელიც ჩვენ ძალიან დაგვეხმარება. ვფიქრობ, რომ ეს იქნება ძალიან დადებითი ჩვენი ურთიერთობებისთვის. ჩვენმა მთავრობამ ძალისხმევა არ დააკლო და ყველა ის ნაკისრი ვალდებულება, რომელიც გათვალისწინებული იყო სავიზო რეჟიმის ლიბერალიზაციის სამოქმედო გეგმის ფარგლებში იქნა შესრულებული. ახლა ჩვენ ველოდებით ევროკავშირის საბოლოო გადაწყვეტილებას", - განაცხადა პრემიერმა.