მთავარი პროკურორობის კანდიდატის ირაკლი შოთაძის განცხადებით, ჩვილების უკანონო გზით გაყვანის თაობაზე გამოძიება მიმდინარეობს, თუმცა დეტალები მისთვის ცნობილი არ არის , - ამის შესახებ შოთაძემ პარლამენტში, ადამიანის უფლებათა დაცვისა და სამოქალაქო ინტეგრაციისა და იურიდიულ საკითხთა კომიტეტების გაერთიანებულ სხდომაზე განაცხადა, სადაც მას დეპუტატმა თამარ კორძაიამ იმ ვიდეორგოლის შესახებ ჰკითხა, რომელიც ჩვილების უკანონო გზით გაყვანას ეხება.
კომიტეტების გაერთიანებულ სხდომაზე, სადაც დეპუტატები ირაკლი შოთაძეს უსმენენ, ასოციაცია "მომავლის იმედის" ხელმძღვანელი თამარ ხაჭაპურიძე ხმაურით შევიდა, რომელიც სწორედ აღნიშნულ საკითხს აპროტესტებს.
იურიდიული კომიტეტის თავმჯდომარე ვახტანგ ხმალაძემ ხაჭაპურიძეს სიწყნარისკენ მოუწოდა, წინააღმდეგ შემთხვევაში კომიტეტის სხდომას დაატოვებინებენ.
"როგორც ჩემთვის ცნობილია ამ საკითხზე მიმდინარეობდა და მიმდინარეობს გამოძიება. მე დეტალურად არ ვარ ამ საქმეში ჩახედული, თუმცა, რა თქმა უნდა, მზად ვარ ამ ფორმატშიც განვიხილოთ ამ საქმის დეტალები. მე არ ვფიქრობ, რომ ეს დასამალი იყოს. მე მზად ვარ ამ შემთხვევაში თქვენთან (მიმართა თამარ ხაჭაპურიძეს) შეხვედრისთვის და შემიძლია დეტალურად გავიარო შემდეგ კვირაში თქვენი პრეტენზიები", - განაცხადა შოთაძემ.
