პარლამენტის ჯანდაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ დღეს, პარლამენტში სპეციალური ბრიფინგი გამართა და "ნაციონალური მოძრაობის" 2010-2012 წლების წინასაარჩევნო დაპირებებზე ისაუბრა. საქმე ეხება სოციალურად დაუცველთა რაოდენობის დინამიკას არჩევნების მიხედვით და ასევე, კოდეინის შემცველი პრეპარატების იმპორტის ზრდას, რასაც თან მისდევს ქვეყანაში პრობაციონერთა რაოდენობის ზრდაც.
"მასალები, რომელიც დღეს გავაცანი საზოგადოებას, ადასტურებს იმ ფაქტს, რაზედაც ჩვენ არაერთხელ გაგვიკეთებია კომენტარი. "ნაცმოძრაობა" მთელი თავისი მმართველობის პერიოდში წინასარჩევნოდ ყველანაირ მანიპულაციას იყენებდა. მე გავასაჯაროვე ის ფაქტები, რაც უშუალოდ ჩემს სფეროს ეხება - სოციალურ მიმართულებას და ნარკოპოლიტიკას. წარმოვადგინე სტატისტიკური მონაცემები, თუ როგორ იზრდებოდა სოციალურად დაუცველთა რაოდენობა არჩევნების მიხედვით. მაგალითად: 2010 წელს სოციალურად დაუცველთა რაოდენობა 350 000-მდე გაიზარდა, ხოლო 2012 წლის საპარლამენტო არჩევნებისთვის 500 000 გადასცდა. სტატუსის გაცემის ქრონოლოგია ზედმიწევნით მისდევს არჩევნების მოახლოებას. ეს არის არჩევნებზე დაფუძნებული სოციალური პოლიტიკა საარჩევნო ხმების მისაღებად და არა საკუთარი მოსახლეობის მდგომარეობის გამოსასწორებლად", - განაცხადა ხუნდაძემ.
რაც შეეხება ნარკოპოლიტიკას, მისი თქმით, პირადად მისთვის შოკისმომგვრელი იყო ის ფაქტი, როდესაც გაეცნო კოდეინის შემცველი პრეპარატების იმპორტის ზრდის ტემპებს არჩევნების მოახლოებასთან დაკავშირებით.
"2010 წელს საქართველოში შემოტანილი იყო 6 მილიონი ერთეული, ხოლო 2012 წელს ამ ნიშნულმა რეკორდულ მაჩვენებელს მიაღწია და 14 მილიონამდე გაიზარდა. პარალელურად ამ პერიოდში იზრდება პირობით მსჯავრდებულთა რაოდენობაც და 2012 წლის აგვისტოს თვის მონაცემებით 40 500 აღწევს. აქვე მინდა აღვნიშნო, რომ 2014 წელს საქართველოში შემოტანილ იქნა მხოლოდ 5 400 ერთეული კოდეინის შემცველი პრეპარატები სამედიცინო დანიშნულებისთვის და ეს მარაგი დღემდე არ ამოწურულა. ამ ფაქტებზე დაყრდნობით შეგვიძლია დავასკვნათ, რომ ყოფილი ხელისუფლება ნარკოპოლიტიკასაც არჩევნების მიხედვით ცვლიდა. არჩევნების მოახლოებასთან ერთად ზრდიდნენ ნარკოტიკული საშუალებების იმპორტს საქართველოში. ამით, ერთი მხრივ, აკმაყოფილებდნენ ნარკოტიკებზე დამოკიდებულთა მოთხოვნას და მეორე მხრივ, მათივე საშუალებით ზრდიდნენ პრობაციონერთა რაოდენობას. ეს კი ამ კატეგიარიაზე კონტროლის მოპოვების საუკეთესო საშუალება იყო", - აცხადებს ხუნდაძემ.
მისივე თქმით, ეს სტატისტიკური მონაცემები იძლევა იმის თქმის საშუალებას, რომ "ნაცმოძარობა" სახელმწიფო პოლიტიკას მხოლოდ საარჩევნო პოლიტიკაზე აგებდა და მოსახლეობაზე მანიპულირების ყველა საშუალებას იყენებდა, მათ შორის სასიცოცხლოდ მნიშვნელოვან თემებსაც.
"ეს არის იმის ნათელი მაგალით, თუ როგორ არ უნდა მართო სახელმწიფო. საბედნიეროდ, ეს დრო მათ მმართველობასთან ერთად დამთავრდა და იმედი მაქვს, საქართველოში ვერც ერთი ხელისუფლება ვეღარ შეძლებს ხალხის ასეთი თემებით მანიპულირებას", - განაცხადა დიმიტრი ხუნდაძემ.
